Bu gün Jurnalistlərin Beynəlxalq Həmrəylik Günüdür (International Day of Journalists’ Solidarity). Bu əlamətdar gün münasibətilə bütün həmkarlarımı təbrik edirəm.
Müstəqil.Az bildirir ki, bu sözləri Azərbaycan Mətbuat Şurasının sədri Əflatun Amaşov özünün sosial şəbəkədəki divarında yayınlayıb.
“Tarixin bütün sınaqlarından ləyaqətlə çıxmağı bacarmış Azərbaycan jurnalistikası bütün çətinliklərinə və məhrumiyyətlərinə rəğmən cəmiyyətin oturuşmuş ictimai institutu kimi özünü təsdiqləyib. Azərbaycan jurnalistikasının gücü onu həm qəbul edilməyə, həm də onunla hesablaşılmağa imkan verir. Cəmiyyət böyük ölçüdə peşəmizi ictimai maraq və mənafelərin qorunmasına yönələn mütərəqqi qüvvə olaraq görür, ona inam və etimad bəsləyir. Bütün bunları jurnalistika eyni zamanda həmrəyliyi ilə əldə edib.
Ümumən jurnalistikanın həmrəy olmağa məhkum peşə olduğu düşüncəsindəyəm. Həmrəylik jurnalistikanın təbiətinə hakim kəsilmiş xarakterdir. Bu günün Azərbaycan jurnalistikası isə həm də dövlətə, dövlətçiliyiyə sədaqət ruhuna köklənmiş həmrəylik nümunəsidir. Arzu edirəm ki, jurnalistlərimizin həmrəyliyi kimi qəbul edilən bütün tədbirlər bundan sonra da Vətənimiz Azərbaycanın inkişafına xismət etsin. Əminəm ki, belə də olacaq.
Əziz həmkarlar, bir daha sizləri əlamətdar gün münasibətilə təbrik edirəm! Həmrəyliyiniz sizləri zirvələrə daşısın!”
Müstəqil.Az
