“Əgər beynəlxalq ictimaiyyət ağılsız diktatoru dayandıra bilmirsə, Azərbaycan onları dayandıracaq…” – İlham Əliyev

Bu sözləri ölkə başçısı Pakistanın Azərbaycanda akreditasiya olunmuş yeni səfirinin etimadnaməsini qəbul edərkən söyləmişdir.

“BMT Təhlükəsizlik Şurasının Ermənistan qoşunlarının bizim ərazilərimizdən tam və qeyd-şərtsiz çıxarılmasını tələb edən 4 qətnaməsi var. Ermənistan demək olar ki, 30 ildir bu qətnamələrə məhəl qoymur və indi onların müdafiə naziri deyir ki, Azərbaycana qarşı, yeni ərazilər uğrunda yeni müharibə olacaq. Baş nazir deyir ki, Qarabağ Ermənistandır”.

Dövlət başçısı vurğulayıb ki, Dağlıq Qarabağın Ermənistan ərazisi olduğunu söyləməsi Paşiinyanın növbəti çirkin yalanıdır. “Sonra da söyləyir  ki, Azərbaycan Dağlıq Qarabağın marionet rejimi ilə danışıqlar aparmalıdır, bu isə danışıqların formatının dəyişməsi deməkdir”.

Prezident xüsusi qeyd etmişdir ki, son zamanlar Ermənistan Livandan gətirilən ermənilərin işğal olunmuş ərazilərdə qanunsuz məskunlaşdırılmasını həyata keçirir. Onlar işğal olunmuş ərazilərdə hərbi təlimlər də təşkil edirlər. Ermənistan rəhbəri Dağlıq Qarabağdakı cinayətkar rejimin saxta liderinin qondarma andiçmə mərasimini Azərbaycanın qədim şəhəri olan Şuşada təşkil edir. Dağlıq Qarabağın cinayətkar xuntasının qondarma parlamentini Şuşaya köçürməyi qərara alırlar və düşünürlər ki, biz bütün bunlara dözəcəyik. Bu, Azərbaycan xalqının hisslərinin birbaşa təhqir olunmasıdır.

Ölkə başçısı qətiyyətlə vurğulamışdır ki, “Biz heç vaxt bununla razılaşmayacağıq və onlara yerlərini göstərəcəyik. Əgər beynəlxalq ictimaiyyət ağılsız diktatoru dayandıra bilmirsə, Azərbaycan onları dayandıracaq. Azərbaycan onlara yerini göstərəcək və öz ərazi bütövlüyünü bərpa edəcək”.