“1990-cı illərin əvvəlindəki səriştəsiz iqtidarların yarıtmaz idarəçiliyi torpaqlarımızın işğalını şərtləndirdi”.
Həmçinin yarıtmaz və təsadüfi “siyasət işbazları”nın ölkədə yaratdığı xaotik dəhşətli siyasi situasiya torpaqlarımızın işğlına zəmin oldu və labüd mühit yaratdı. Bu mühit də erməni işğalçıları və havadarları üçün əhəmiyyətli şəkildə ciddi münbit vəziyyət demək idi…
Artıq, Qarabağın və Azərbaycanın nadir incisi olan gözəl Şuşamızın terrorçu ermənistan tərəfindən işğalından 27 il keçir.
27 il əvvəl müstəqilliyimizin sözdə qazanıldığı bir vaxtda bir qrup dövlət idarəçiliyindən və ordu quruculuğundan xəbərsiz‚ səriştəsiz şəxslərin ölkəyə rəhbərlik etməsi Azərbaycanı olmazın fəlakətlərinə sürükləməkdəydi. Xocalı faciəsindən başlayaraq başsız və idarəsiz ölkəyə qarşı hər tərəfdən və hər cəbhədən hücuma keçən erməni daşnaqları və havadarları olan müttəfiq qüvvələr Azərbaycanlılara qarşı etnik təmizləmə‚ xalqımızı yox etmək siyasətini həyata keçirtməyə başladılar. Erməni lobbisinin planladığı “böyük ermənistan dövləti” xülyasını Azərbaycanın tarixi torpaqlarında‚ Azərbaycanlıların öz həqiqi dədə-baba mülklərinin üzərində qurmağa can atırdılar. 1992-ci ilin hələ aprelin axırlarından ermənilər Şuşa üzərinə hücuma başlamışdılar. Mayın 6-dan isə intensiv hücumlarla Şuşanı mühasirəyə aldılar. Azərbaycanın və Qarabağın nadir incisi olan Şuşa şəhəri ağır artileriya hücumlarına məruz qalaraq od-alov içərisində yandığı bir zamanda həmin vaxt ölkə rəhbərliyində təmsil olunanlar Şuşanın müdafiəsini təşkil etmədilər. Şuşanın müdafiəsində olan qəhrəman əsgərlərimiz və könüllülərimiz qəhrəmancasına vuruşsalar da qeyri-bərabər olan döyüşlərdə sayca və texnika baxımından qat-qat çox və güclü olan müttəfiq qüvvələrin dəstək verdiyi erməni terrorçuları Şuşanı işğal etməyə müvəffəq oldular. Bu zaman ölkənin siyasi rəhbərliyində və siyasi elitada olanların başı hakimiyyət davasına qarışmışdı. Bu səbəbdən Şuşanın və digər ərazilərin müdafiəsi yetərli olmadı. Həmin zaman Azərbaycanda vahid komandanlığın‚ mərkəzi hakimiyyətin‚ vahid nizami müzəffər ordunun və ölkəni layiqincə idarə edə biləcək səriştəli rəhbərliyin olmaması Şuşa və Qarabağ olmaqla ətraf rayonların‚ BMT-nin tanıdığı 86‚6 min kvadrat klometr ərazinin toplam 20 faizi erməni işğalçıları tərəfindən işğal olunmasına yol açdı.
Bu işğalın Azərbaycan dövlətinə və Azərbaycan xalqına vurduğu ziyanlığın miqyası qorxunc rəqəmlərlədir. Ölkəmizə dəyən mənəvi ziyanlıqdan əlavə‚ dəymiş maddi ziyanlıq milyardlarla dollar həcmindədir. Azərbaycanın bütün tarixi abidələri‚ strateji obyektləri‚ dini abidələr‚ milli mədəniyyət abidələri‚ kütləvi yaşayış məskənləri yerlə yeksan edilərək darmadağın edildi və dəhşətli mənəvi faciələr həyata keçirildi. Dinc sakinlərə hərbi hücumlar‚ çox sayda sivil sakinlərin əsir aparılması‚ yaşayış obyektlərinin kütləvi məhv edilməsi‚ əsir götürülən insanlara işgəncə verilərək daxili orqanlarının diri-diri çıxarılaraq xarici bazarlarda satılması halları tarixin ən böyük vəhşətləri idi. Serj Sərkisyanın‚ Robert Koçaryanın‚ Seyran Ohanyanın və Zori Balayanın Qarabağla bağlı etirafları dəhşət doğurur. Qarabağ və ətraf ərazilərdə törədilən terrorların mahiyyətindən danışarkən erməni canilərinin etirafları ermənistanın iç üzünü açıq sərgiləməkdədir. Lakin baş vermiş ürək dağlayan faciələrə və soyqırım faktlarına‚ Azərbaycanın BMT-yə daxil olduğu qanuni torpaqlarının zorla işğal edilməsi faktına Dünya Birliyi‚ beynəlxalq insan haqqlarından danışan hüquqi təşkilatlar‚ ikili standartlar mövqeyindən yanaşmaqdadır. Azərbaycan torpaqlarının işğal olunmasına‚ 1 milyon soydaşımızın öz dədə-baba torpağından və mülkündən didərgin düşməsinə‚ 1 milyon insanın hüququnun tapdalanmasına göz yumulması əsl ermənipərəstlikdir. Eləcədə BMT Təhlükəsizlik Şurasının ermənistanın işğal etdiyi Azərbaycan torpaqlarını tərk etməsi barədə qəbul etdiyi qətnamələrinin icra olunmaması isə beynəlxalq hüquq normalarının tapdalanmasıdır..
Ən dəhşətli hallardan biri isə Qarabağda Xocalıda‚ Şuşada işğal olunmuş Azərbaycan torpaqlarında erməni vandalları tərəfindən xalqımıza qarşı qan donduran cinayətlər həyata keçilərkən o dövrün rəhbərçiliyində olan şəxslər hakimiyyət davası edirdilər. 1990-cı illərin siyasət meydanında olanlar öz şəxsi marağı naminə ölkəni daxili savaşlara da sürükləməkdəydilər. Bunun acı nəticəsini isə Azərbaycan xalqı yaşadı. Dövlət idarəçiliyindən anlamayan bir qrup silahlı insanın meydana çıxıb dərəbəylik və xaos yaratması çox böyük faciələrə və dəhşətlərə yol açdı. Həmin səriştəsiz insanların xalqımızın və dövlətimizin başına gıtirdiyi bəlalar bu gün də bir çox hallarda öz təsirini hələ də göstərməkdədir. Qarabağın işğal səbəbi daxildə yaradılmış xaos və iç savaşın ünsürləriydi. Dövlətin daxildən zəiflədilməsi‚ düşmənə qarşı vahid mübarizənin və vahid komandanlığın olmaması torpaqlarımızın əsas işğal səbəbi idi…
Artıq tale Azərbaycan xalqınının üzünə gülməkdədir. Ölkənin layiqli və mükəmməl idarəçiliyi öz sözünü hər sahədə deməkdədir. Ordu quruculuğuna göstərilən diqqət və bu sahəyə xüsusi önəm verilməsi Azərbaycan ordusunun gücünü‚ qüdrətini‚ hərbi potensialını və arsenalını o cümlədən hərbi döyüş ruhunu regionun ən güclü və qüdrətli ordusu səviyyəsinə qaldırdı. Bu günkü qüdrətli ordumuz mütləq şəkildə Qarabağı‚ Şuşanı və bütün işğal olunmuş torpaqlarımızı işğaldan azad etmək gücündədir. Və əminliklə demək olarki həmin gün çox yaxındır.
Mirsamir Məmmədov
Politoloq
