Bakıda Heydər Əliyev adına İdman Konsert Kompleksində Xarici İşlər Nazirliyinin, Gənclər və İdman Nazirliyinin, BMT-nin Azərbaycanda Rezident Əlaqələndiricisinin Ofisinin və Qoşulmama Hərəkatının Gənclər Təşkilatının təşkilatçılığı ilə Beynəlxalq Xeyriyyə Yarmarkası təşkil olunub.
Bu barədə XİN-dən məlumat verilib.
Qeyd olunub ki, tədbirin təşkilinə həmçinin Mədəniyyət Nazirliyi, Dövlət Turizm Agentliyi, Azərbaycan Beynəlxalq İnkişafa Yardım Agentliyi (AIDA), Azərbaycan Gənclər Təşkilatları Milli Şurası, Azərbaycan Gənclər Fondu, BP Azərbaycan və iTicket.az şirkətləri də töhfə verib.
Yarmarka Azərbaycan – BMT tərəfdaşlığının 30 illiyi, Azərbaycanın Qoşulmama Hərəkatına sədrliyinin 3 ilinin tamam olması və hər il dünyada 24 oktyabr tarixində qeyd olunan BMT gününə həsr olunub. Tədbirə 40-dan artıq ölkə qatılıb.
Tədbirdə açılış nitqi ilə çıxış edən nazir Ceyhun Bayramov Azərbaycanda ilk dəfədir bu formatda təşkil olunmuş tədbirin xarici ölkələrin mədəniyyətinin, mətbəxinin və musiqilərinin ölkəmizdə təqdim edilməsi üçün faydalı olduğunu diqqətə çatdırıb. Bununla yanaşı, tədbirdən əldə olunacaq vəsaitin Azərbaycanda fiziki imkanları məhdud uşaqlarla bağlı həyata keçirdiyi layihənin maliyyələşdirilməsinə sərf olunacağının təqdirəlayiq hal olduğunu bildirib. Nazir ölkəmizin BMT-nin fəal üzvlərindən olduğunu, beynəlxalq səviyyədə sülh və təhlükəsizlik, davamlı inkişaf və humanitar sahələrdə geniş töhfələr verdiyini, bu tədbirin ölkələr arasında dostluq və əməkdaşlığın daha da inkişafına xidmət edəcəyini vurğulayıb.
Daha sonra BMT-nin Qaçqınlar üzrə Ali Komissarlığının Azərbaycandakı nümayəndəsi, BMT-nin Azərbaycandakı Rezident Əlaqələndiricisi vəzifələrini icra edən Quido Ambroso çıxış edərək, təşkil olunmuş tədbirin tədbirdə iştirak edən ölkələrlə Azərbaycan arasında əməkdaşlıq əlaqələrinin inkişaf etdirilməsi baxımından əhəmiyyətini diqqətə çatdırıb. BMT tərəfindən həyata keçirilən layihələr və prioritet istiqamətlər barədə məlumat verib.
Tədbir çərçivəsində müxtəlif ölkələrin Azərbaycanda akkreditə olunmuş nümayəndəlikləri tərəfindən təmsil etdikləri ölkələrin mədəniyyətlərini tərənnüm edən milli mətbəx nümunələri və suvenirlər xeyriyyə məqsədilə satışa çıxarılıb. BMT-nin müxtəlif qərargahlarında illik əsasda həyata keçirdiyi bənzər xeyriyyə tədbirlərinin təcrübəsinə uyğun olaraq, yarmarkanın gedişatında bir sıra qiymətli hədiyyələrin qazanılması üçün müsabiqə təşkil edilib. Tədbirdə, iştirak edən ölkələrin və Azərbaycanın milli rəqs və musiqi nömrələrindən ibarət geniş mədəni proqram nümayiş olunub.
Tədbir çərçivəsində, eyni zamanda Azərbaycan Beynəlxalq İnkişafa Yardım Agentliyi (AIDA) tərəfindən təşkil olunmuş sərgidə ölkəmiz tərəfindən həyata keçirilən beynəlxalq yardım fəaliyyətinə dair şəkillər nümayiş olunub, eləcə də informativ bukletlər qonaqlara təqdim edilib.
Tədbirə giriş və müsabiqədə iştirak üçün biletlərin satışı, eləcə də yarmarkada həyata keçirilən satışlardan əldə olunan ümumi vəsait BMT-nin Uşaqlar Fondunun (YUNISEF) Azərbaycanda fiziki imkanları məhdud uşaqlarla bağlı həyata keçirdiyi layihənin maliyyələşdirilməsinə sərf olunacaq.
12:07
Azərbaycan Xarici İşlər Nazirliyinin (XİN) keçirdiyi xeyriyyə yarmarkasından toplanan bütün vəsait sağlamlıq imkanları məhdud uşaqların ehtiyaclarına yönəldiləcək.
“Report” xəbər verir ki, bunu Azərbaycanın xarici işlər naziri Ceyhun Bayramov Bakıda keçirilən Beynəlxalq Xeyriyyə Yarmarkasının açılış mərasimində deyib..
Onun sözlərinə görə, XİN belə bir tədbiri ilk dəfədir təşkil edir: “Bu tədbir ölkənin mədəni müxtəlifliyini nümayiş etdirmək məqsədi daşıyır və müxtəlif ölkələrin diplomatik korpuslarına bir-birini daha yaxından tanımağa, həmçinin özəl sektorda əməkdaşlığı inkişaf etdirməyə imkan verir”.
C.Bayramov vurğulayıb ki, sərgi Azərbaycan ilə BMT arasında tərəfdaşlığın 30 illiyi, Azərbaycanın Qoşulmama Hərəkatına sədrliyinin 3 illiyi və BMT Günü münasibətilə təşkil edilib.
