Bakı Apellyasiya Məhkəməsində dələduzluqda təqsirləndirilən Qabil Məmmədovun (şərti) barəsindəki hökmdən verilən apellyasiya şikayətinə baxılıb.
Pravda.az-ın əldə etdiyi məlumata görə, hakim Cavid Hüseynin sədrliyi ilə keçirilən prosesdə qərar elan olunub.
Qərara əsasən, təqsirləndirilən şəxsin Cinayət Məcəlləsinin 178.2.4-cü (xeyli miqdarda ziyan vurmaqla törədildikdə) maddəsi ilə təqsirləndirilməsinə dair Qaradağ Rayon Məhkəməsinin 28 noyabr 2022-ci il tarixli hökmü apellyasiya şikayətlərinə münasibətdə dəyişdirilib.
Belə ki, Qabil Məmmədovun 2 il müddətinə azadlıqdan məhrumetmə cəzası 3 il müddətinə azadlığın məhdudlaşdırılması (elektron qolbaq) cəzası ilə əvəz edilib. Təqsirləndirilən şəxs barəsində seçilmiş həbs qətimkan tədbiri ləğv olunub və o, məhkəmə iclas zalında dərhal həbsdən azad edilib.
İttihama görə, Qabil Məmmədov sabiq iş yoldaşı olmuş zərərçəkmiş Vilayət Həsənovu (şərti) Qaradağ Rayon İcra Hakimiyyəti tərəfindən veriləcək sosial mənzillərdən yeddisini, hər bir mənzil üçün ilkin ödəniş kimi 3000 manat olmaqla növbədənkənar təşkil etməsi vədi ilə aldadıb. O, 2017-ci ilin yanvar, fevral və mart aylarında zərərçəkmişdən ümumilikdə 25 625 manat pulu dələduzluq yolu ilə ələ keçirib.
