Gürcüstan parlamentinin Xarici Əlaqələr komitəsində bu ölkənin Azərbaycan, Türkiyə və Ermənistandakı səfirləri dinlənilib.
-nın Tbilisi müxbiri xəbər verir ki, qapalı keçən dinləmə zamanı regionda vəziyyət, Ermənistan-Azərbaycan sülh prosesi, həmçinin birgə iqtisadi layihələrə, humanitar məsələlərə diqqət yetirilib.
Gürcüstanın Azərbaycandakı səfiri Zurab Pataradze 2023-cü ilin Gürcüstan-Azərbaycan əlaqələrinin baxımından kifayət qədər intensiv keçdiyini, ikitərəfli siyasi əlaqələrin dinamik inkişaf etdiyini qeyd edib. Vurğulayıb ki, bu il iki ölkə arasında ticarət dövriyyəsinin həcmi 1 milyard dolları ötəcək. O, iki ölkənin Orta Dəhlizin gücləndirilməsi, regiona əlavə yüklərin cəlb edilməsi istiqamətində işlədiyini qeyd edib.
Gürcüstanın Türkiyədəki səfiri Giorgi Cancqava da Gürcüstan və Türkiyə arasında münasibətlərin zirvəyə çatdığını bildirib. O, iki ölkə arasında ticarət dövriyyəsinin həcminin 3 milyard dollara yaxınlaşdığını qeyd edib. Əlavə edib ki, 2005-ci ildən sonra Türkiyə Gürcüstana 2 milyard dollardan çox sərmayə qoyub.
Gürcüstanın Ermənistandakı səfiri Giorgi Şarvaşidze də ölkəsinin Ermənistanla iqtisadi əlaqələrinin inkişaf etdiyini qeyd edib. Əlavə edib ki, Ermənistandan Gürcüstana gələn turistlərin sayı bu il 41% artıb. O, İrəvan Dövlət Universitetində Gürcüstan Mərkəzinin açılacağını qeyd edib.
