25 noyabr 2024-cü il tarixdə Azərbaycan Yazıçılar Birliyi Lənkəran Bölməsinin, Cəlilabad Rayon İcra Hakimiyyəti və Regional Mədəniyyət İdarəsinin Cəlilabad Mədəniyyət Şöbəsinin birgə təskilatçılığı ilə tanınmış şair mərhum Abbasağa Azərtürkün anadan olmasının 90 illiyi münasibətilə Cəlilabad şəhərində yerləşən Heydər Əliyev Mərkəzində geniş yubiley tədbiri keçirildi.
Bölgə yazarları, rayon ziyalıları, ictimaiyyət nümayəndələri, Cəlilabadda yaşayan söz adamları və mərhum şairin yaxın qohumlarının birgə iştirakı ilə keçirilən bu möhtəşəm tədbirdə çıxış edən çoxsaylı natiqlər şairlə bağlı xatirələrini dilə gətirib, “Üsyankar şair” kimi tanınan mərhum Abbasağa Azərtürkün ədəbiyyatımıza göstərdiyi xidməti yüksək qiymətləndirdilər.
Tədbirdə məktəblilərin ifasında səslənən şairin şeirləri alqışlarla qarsılandı. Məlumat üçün qeyd etmək lazımdır ki, tədbirdə AYB Lənkəran Bölməsinin sədri, yazıçı-publisist, ziyalı və müdrik şəxsiyyət Qafar müəllim Cəfərli, AYB Lənkəran Bölməsinin ədəbi məsləhətçisi, ziyalı şəxsiyyət Ağamir Cavad və digər dəyərli qonaqlar da, iştirak edirdilər.
Sonda “Sözün işığı” qəzetinin təsisçisi və baş redaktoru, tanınmış şair-publisist Ədalət Salmanın redaktorluğu ilə nəşr olunan və mərhum şairin şeirlərini özündə ehtiva edən “Cavabsız məktublar” adlı kitabı tədbir iştirakçılarına hədiyyə edildi. Daha sonra isə xatirə fotoları çəkildi…
İlqar İSMAYILZADƏ
