21 yaşadək futbolçulardan ibarət yığmamızın köməkçi məşqçisi, “Qarabağ”ın və millinin sabiq qapıçısı Cahangir Həsənzadə apasport.az-a saytına müsahibə verib.
Həmin müsahibəni təqdim edirik:
– Əvvəllər “Qarabağ”ın formasını geyinmisiz. Həmin vaxt ağlınıza gələrdi ki, Ağdam klubu gələcəkdə Çempionlar Liqasının qrup mərhələsində oynayacaq?
– “Qarabağ”da oynamışam, kubok qazanmışam. Amma dediyiniz məqam mənə inandırıcı gəlmirdi. Çünki bu, əlçatmaz şey idi.
– “Qarabağ” artıq qrupda 3 oyun keçirib. Keçmiş komandanızın həmin matçlardakı çıxışını necə dəyərləndirirsiz?
– Oyundan-oyuna komanda daha inamlı təsir bağışlayır, futbolçuların meydanda davranışı yaxşılaşır. İlk görüşdə “Çelsi”yə böyük hesabla uduzmuşduqsa, növbəti matçda “Roma”ya qarşı 2-3 dəfə aşağı səviyyədə futbol göstərmədik. Təbii ki, ilk 15 dəqiqə istisna idi. Ümumilikdə, “Qarabağ” öz gücünü “Roma”ya göstərməyi bacarmışdı. Üçüncü oyunda da göründü ki, komanda artıq özünə inanır və Çempionlar Liqası ab-havasını tam tutub. Həmin qarşılaşmada “Qarabağ” psixoloji cəhətdən çətinlik çəkmədi. Yalnız taktiki-texniki problemlər hiss olunurdu ki, bu da qaçılmazdı. Çünki səviyyə fərqi böyükdü.
– “Qarabağ”ın “Atletiko” ilə bu gün keçirəcəyi matçdan hansı nəticəni gözləyirsiz?
– “Atletiko” da “Qarabağ”ı təhlil edib. Bakıdakı qarşılaşmada komandamızdan o cür inamlı oyun, bəlkə də, gözləmirdilər. Biz ilk görüşdə “Atletiko”nun möhtəşəm oyununu görə bilmədik. “Qarabağ” öz istəyi ilə rəqibə imkan vermədi. Komandamız yaxşı nəticəyə imza atmaq üçün çox əziyyət çəkdi, əzmkarlıq göstərdi. Cavab matçına gəldikdə, Bakıda qeydə alınan hesab futbolçularımızda özünəinam hissini artırdı. “Atletiko”nu indiyə kimi hardasa əlçatmaz klub kimi görürdüksə, indi anlayırıq ki, onlarla da oynamaq olar. Rəqib bizim üçün əlçatan olub və bu, futbolçularımızın lehinədi. Bakıda “Qarabağ”a qalib gələ bilməməsi “Atletiko” üçün daha böyük qıcıq mənbəyi oldu. Çünki qrupda bütün komandalar “Qarabağ”la matça potensial 6 xallıq oyun kimi baxırlar. Bu mənada, əlindən gələni edəcək ki, qələbə qazansın. Yeni arenada oynayacaqlar. Doğma azarkeşləri qarşısında “Atletiko” ikiqat üstün oynamağa çalışacaq.
– Amma nəzərə alaq ki, “Atletiko” cari mövsümü istənilən səviyyədə keçirmir…
– İstənilən halda, “Atletiko” evdə Bakıdakı heç-heçənin əvəzini çıxacaq gücdədi. Amma “Qarabağ” da rəqibə öz gücünü göstərib.
– “Qarabağ”ın qapıçısı İbrahim Şehiç haqda fikirlər birmənalı deyil. Sabiq qolkiper olaraq, bosniyalı barədə nə düşünürsüz?
– Biz Şehiçi indiyə kimi sırf daxili çempionat səviyyəsində görmüşük və o rakursdan qiymətləndirmişik. Əslində, Premyer Liqada onun qol vəziyyətləri zamanı xilaskarlığını çox görə bilmirik. Çünki çempionatın ən güclü komandasında oynayır. İndi çıxış etdiyi mərhələ isə top-mərhələdi. Artıq Şehiçin əsl gücünü görürük. Çempionlar Liqasında oynamaq daha böyük gərginlik, konsentrasiya tələb edir. Qrupdakı ilk matçlarda psixoloji cəhətdən bir az çətinlik yaşadı. Amma oyundan-oyuna öz çıxışını tutur və “Atletiko” ilə Bakıdakı qarşılaşmada da kritik qurtarışlar etdi.
– Bəziləri “Qarabağ”ın əsas heyətində Anton Kanibolotskinin yer almalı olduğunu düşünür…
– Kanibolotskinin çıxışını harda görmüşük ki? Çempionat matçlarında nə qədər kritik müdaxilə edib? Bunu birmənalı qiymətləndirmək olmaz. Kanibolotskini Şehiçlə müqayisə edə bilmərik. Çünki biri Çempionlar Liqasında oynayır, digəri isə daxili çempionatda bir neçə matçda forma geyinib. Onları fərqləndirmək çətindi. Düşünürəm ki, indiki vəziyyətdə Şehiçin oynaması daha məqsədəuyğundu.
