“Kədərin dadı da çox acı olur, Süzülüb, qoyulub indi dəm üstə…”- Şükür Qafar…

Müstəqil.Az “Yaradıcılıq işığı” rubrikasında Şükür Qafarın şeirlərini təqdim edir:

Öpüş izlərini yuyuram indi

Yenə oğrun-oğrun baxışlarından
Sevgi çilənibdir xeyallarıma.
Qəlbimi oxlayan qaşın, kirpiyin ,
Çəkilib yay kimi yenə tarıma.

Xəyalım toxunur dodaqlarına,
Isti nəfəsini duyuram indi.
Yanaqdan süzülən göz yaşlarımla
Öpüş izlərini yuyuram indi.

Gəl görüş yerinə əvvəlki kimi,
Həsrətin əzabın, kədərin ataq.
Unudaq qüssəni, qəmi, nisgili
Biz də sevənlərtək vüsala çataq.

Sənin saçlarında sevdim payızı

Sənin saçlarında sevdim payızı
Sevdim yarpaqların sarı rəngini.
Sevdim saman kimi saralıb gedən
Ömrün xəzan olmuş bu ahəngini.

Küləkli havada uçub rəqs edən
Sarı çiçəklərin tozunu sevdim.
Allahın sevdiyi rəngə boyanmış
Sən kimi sarışın qızını sevdim.

Dünyaya nur saçan Günəşə, Aya
Görəsən nə üçün sarı geyilib?
Bəlkə də meyvənin sarılığından
Adəm tərəfindən buğda yeyilib.

Bu rəng niyə belə hopub ömrümə?
Sanki həyatımda tək bu rəng qalıb.
Sənə son yazdığım eşq məktubu da
Cibdə qaldığından rəngi saralıb.

Nə qədər saysan da artmayacaqdır
On barmaq sayılır, sayanda sayda.
Əgər qismətində ayrılıq varsa
Saç ucu düyünlə, bundan nə fayda.

Hardan bilərdik ki, ayrılığın da
Köksündə köklənən sim sarı simdir.
Nə yaxşı, gözünün rəngi yaşıldır.
Cənnətdə qovuşsaq mənim bəsimdir.

Ovcumda çəkilən taleh yolları
Alnımda yazılan qismətdən keçmir.
Həsrətdən gözümün suyu çəkilib,
Daha bu sevgidən gözüm su içmir.

Yaman soyuq keçir eşqin baharı,
Titrəyən dişlerim dilimi kəsir.
Bu sevgi qəlbimi ele üzüb ki,
Sakit havada da ürəyim əsir.

Bu eşqin yükünü çəkən tərəzi
Oxunu kökləyib kədər, qəm üstə.
Kədərin dadı da çox acı olur,
Süzülüb, qoyulub indi dəm üstə.

Müstəqil.Az

Arxİv