Almaniyada hakim koalisiyaya daxil olan və kansler Olaf Şoltsun liderlik etdiyi Sosial Demokrat Partiyası (SDP) İran hakimiyyətinin nümayişçilərə qarşı hərəkətlərini pisləyib və ölkəyə qarşı əlavə sanksiyalar tətbiq etməyə çağırıb.
Bu barədə bazar günü partiyanın qurultayının yekununda qəbul edilmiş bəyanatda deyilir.
“Yüzlərlə ölüm, siyasi sui-qəsdlər, saysız-hesabsız yaralananlar və ölüm cəzasına qədər ağır cəzaya məruz qalan on minlərlə məhbus İran rejiminin qeyri-insani ideologiyasının və zorakılığının yeni ifadəsidir”, – deyə mətndə bildirilib.
Sənəddə vurğulanır ki, İran hakimiyyətinin hərəkətlərinə diplomatik etiraz üçün bütün kanallardan istifadə edilməlidir.
“İran xalqının azadlığı kobud güclə məhdudlaşdırıldıqca İran hakimiyyəti ilə normal münasibətlər ola bilməz”, – bəyanatda qeyd olunur.
SDP üzvlərinin fikrincə, Almaniya hökuməti BMT İnsan Haqları Şurasının İranda insan haqları pozuntuları ilə bağlı müstəqil araşdırma aparmaq qərarına gəlməsini də təmin etməlidir. Həmçinin, iranlıların Almaniyadan deportasiyası növbəti xəbərdarlığa qədər dayandırılmalı, həssas şəxslər üçün vizaların alınması proseduru sadələşdirilməlidir.
Bəyanat, həmçinin nüvə sazişinə sadiq qalmağa çağırır. SDP-nin həmsədri Lars Klinqbeylin fikrincə, İran nüvə silahına malik olmamalıdır.
“İranın gələcəkdə nüvə silahı yaratmaq qabiliyyətinə yiyələnməsi İranın özündə, bütövlükdə Yaxın Şərqdə insanların sülh və təhlükəsizliyinə və ən azı İsrailin mövcudluğuna təhdid deməkdir”, – sənəddə bildirilir.
Mənbə: TASS
