May ayının 29-da Az.TV-nin və Beynəlxalq Muğam Mərkəzinin solisti, sevimli müğənnimiz, şöhrətli xanəndə Almaxanım Əhmədlinin Heydər Əliyev adına sarayda solo konserti olub. Bu tədbir sənətçinin sayca 4-cü, Heydər Əliyev adına sarayda isə ilk böyük solo konsertidir. Müğənnini tarzən Məsim İslamovun rəhbərliyi ilə “Bayatı-türk” insturmental ansamblı məharətlə müşayiət edib.
Konserti peşəkarlıqla idarə edən məşhur teleaparıcı Azər Süleymanlı tədbir boyu hər musiqi nömrəsinin mətninə uyğun tanınmış şair Vüqar Əhmədin şeirlərini səsləndirib. Anşlaqla keçən konsertdə muğam, xalq, aşıq və bəstəkar mahnıları, eləcə də türk və estrada nəğmələri ifaçı tərəfindən peşəkarlıqla, orijinallıqla, yüksək məharətlə ifa olunub və sürəkli alqışlarla qarşılanıb.
Aparıcı Azər Süleymanlı Heydər Əliyevin 100 illiyi günlərində onun adını daşıyan fondun keçirdiyi 6-cı televiziya muğam müsabiqəsinin “Qran- Pri” mükafatçısı Almaxanımı belə əzəmətli, möhtəşəm konsertə görə təbrik etmiş, uğurlar arzulamış, eyni zamanda Müstəqillyimizin 105 illiyi və Türkiyədəki demokratik seçkilərdə Rəcəb Tayyib Ərdoğanın qalib gəldiyinə görə tamaşaçıları təbrik etmişdir. 2000 min nəfərlik tam dolu olan salonda dövlət məmurları, millət vəkilləri, elm və sənət nümayəndələri də iştirak ediblər. Sonda “Yaşa mənim xalqım” mahnısı Almaxanımla yanaşı, ayaqüstə duran tamaşaçılarla birgə ifa olunmuşdur. 21 yaşlı gənc xanəndə – müğənnimizə uğurlar arzu edirik.
