“Azərbaycan Qarabağ münaqişəsini həll edib. Hətta İrəvanda da bu problemin artıq keçmişdə qaldığına dair fikirlər səsləndirilir. Ermənistan rəsmiləri sülhün əldə olunması üçün danışıqların inkişaf etdirilməsindən, Türkiyə və Azərbaycanla münasibətlərin yoluna qoyulmasından danışır. Belə olan halda bəzi Avropa dövlətlərinin, beynəlxalq təşkilatların tez-tez “Dağlıq Qarabağ münaqişəsi” ifadəsini işlətməsi heç cür başa düşülən deyil. Hesab edirəm ki, bu ifadə siyasi leksikondan çıxarılmalıdır. Cənubi Qafqazda sülh və sabitliyin bərqərar olmasında maraqlı olan qüvvələr keçmişə deyil, gələcəyə baxmalıdır. Onlar Azərbaycan-Ermənistan münasibətlərinin yaxşılaşması üçün reallığa söykənən təşəbbüslərlə çıxış etməlidirlər”.
Bunu -a açıqlamasında politoloq Ramiz Alıyev bildirib.
Onun sözlərinə görə, Prezident İlham Əliyev Münhendə ATƏT-in fəaliyyətdə olan sədri, Malta Respublikasının xarici, Avropa işləri və ticarət naziri İan Borqla görüşdə çox haqlı olaraq beynəlxalq təşkilatların məsələyə yanaşmasının dəyişməsinin vacibliyini irəli sürdü: “Cənab Prezident görüşdə qeyd etdi ki, ATƏT çərçivəsində keçmişin qalıqları olan bir sıra mexanizmlərin – bu xüsusda ATƏT-in Minsk qrupu, Yüksək Səviyyəli Planlaşdırma Komitəsi və ATƏT-in fəaliyyətdə olan sədrinin şəxsi nümayəndəsi kimi tamamilə fəaliyyətsiz olan bu strukturlar rəsmi qaydada ləğv edilməlidir. ATƏT büdcə vəsaitlərini həll olunmuş problemlərə deyil, həlli vacib olan məsələlərə yönəltməlidir. Qarabağ münaqişəsi artıq həll olunub, Azərbaycan öz suverenliyini və ərazi bütövlüyünü təmin edib. Ermənistanla Azərbaycan arasında normallaşma prosesi ikitərəfli xarakter daşıyır. Biz görürük ki, bəzi xarici dövlətlərin və beynəlxalq təşkilatların Azərbaycan-Ermənistan münasibətlərinə müdaxiləsi proseslərə mənfi təsir göstərir. Onlar “sülhə töhfə” adı altında proseslərin inkişafının istiqamətini dəyişirlər, nəticə etibarı ilə münasibətlərə xələl gətirir, danışıqlara mane olurlar. Bəlkə də 2020-ci il 44 günlük Vətən müharibəsindən sonra Ermənistan-Azərbaycan münasibətlərindəki düyünlər tezliklə açılacaqdı, amma beynəlxalq güclər buna imkan vermədi. Şirin vədlərə, siyasi dəstəyə aldanan İrəvan isə bu günə qədər Azərbaycanın təklif etdiyi sülh təkliflərinə cavab vermir, sülh müqaviləsini imzalamır. Hesab edirəm ki, ATƏT-in Minsk qrupu, Yüksək Səviyyəli Planlaşdırma Komitəsi və ATƏT-in fəaliyyətdə olan sədrinin şəxsi nümayəndəsi kimi strukturların hələ də qalması sülh prosesinin inkişafını ləngidir”.
Politoloq qeyd edib ki, ATƏT-in Minsk Qrupunun 28 ildir, həll edə bilmədiyi problemi Azərbaycan Ordusu 44 günə aradan qaldırıb: “1993-cü ildə BMT Təhlükəsizlik Şurasında Azərbaycan torpaqlarının qeyd-şərtsiz işğaldan azad edilməsi ilə bağlı qətnamə 27 il ərzində icra olunmamış qaldı. Böyük dövlətlər Ermənistana təzyiq göstərmək əvəzinə ATƏT-in Minsk qrupu adlanan mənasız qurum yaradaraq status-kvonu möhkəmləndirməklə məşğul oldu. Hətta onlar 2009-cu ildə BMT Baş Assambleyasında Azərbaycanın ərazi bütövlüyü ilə bağlı keçirilən səsvermədə ölkəmizin əleyhinə səs verdilər. Prezident İlham Əliyev andiçmə mərasimindəki çıxışında da bu məsələyə toxunaraq qeyd etdi ki, Ermənistan və onun arxasında dayanan qüvvələr beynəlxalq hüquqa, BMT Təhlükəsizlik Şurasının dörd qətnaməsinə əməl etsəydi, müharibə olmaya bilərdi. Azərbaycan dövləti uzun illər ərzində təmkin göstərirdi. Bu isə işğalçı dövləti daha da azğınlaşırdı, hesab edirdilər ki, bizim torpaqlarımızı əbədi işğal altında saxlaya bilərlər. Ermənistan bu inadkarlıq gücünü Minsk Qrupu kimi təşkilatların təsisçilərindən alırdı. Bu gün Ermənistanın məğlub, ac-səfalətli durumda yaşamasının məsuliyyəti vaxtilə ona şirin vədlər verən güclərin üzərinə düşür. Onlar Ermənistanın müharibədəki itkilərinə, Qarabağdan köçüb getmələrinə, dünyanın dörd bir yanına səpələnmələrinə görə məsuliyyət daşıyırlar. Minsk qrupu yarandığı vaxtdan heç vaxt Ermənistanı işğalçı dövlət kimi göstərməyib. Bu gün Azərbaycan ilə Ermənistan arasında artıq de-fakto sülh mövcuddur. Bu prosesin məntiqi sonluğa çatması üçün sülh müqaviləsi imzalanmalıdır. Beynəlxalq təşkilatların Cənubi Qafqaza töhfəsi o olardı ki, sülh müqaviləsinin imzalanması üçün Ermənistana təzyiq göstərsinlər. Görünür, Minsk qrupunun, Yüksək Səviyyəli Planlaşdırma Komitəsinin təmsilçiləri və ATƏT-in fəaliyyətdə olan sədrinin şəxsi nümayəndəsi bölgəyə turist səfərləri etməkdən zövq alırlar. Onlar işsiz qalacaqlarından ehtiyat edirlər”.
