“Azercell Telekom” MMC-nin bu ilin oktyabr ayında elan etdiyi “Tələbə Təqaüdü” proqramının nəticələri müəyyən edilib.
“Qafqazinfo” xəbər verir ki, proqrama 1100-dən çox müraciət daxil olub.
Mərhələli seçim prosesinin sonunda 25 tələbə “Azercell”in təqaüdçüsü adına layiq görülüb.
Proqram qalibi olan tələbələr ali təhsil müddətinin sonunadək “Azercell” şirkəti tərəfindən 200 AZN məbləğində aylıq təqaüd alacaqlar.
Qeyd edək ki, seçim marketinq, biznes analitikası, data elmi, informasiya texnologiyaları və kibertəhlükəsizlik kimi istiqamətlərin dəyərləndirilməsi üzrə elan edilib.
Həmçinin, “Tələbə Təqaüdü” proqramı yalnız maddi dəstəklə məhdudlaşmır. Təqaüdlə yanaşı, gənclər telekommunikasiya sahəsi haqqında biliklərini artırmaq, şirkətin korporativ tədbirlərinə dəvət almaq, müxtəlif təlimlərdə iştirak etmək və şirkətdə təcrübə keçmək imkanı əldə edəcəklər.
“Azercell Telekom” MMC korporativ sosial məsuliyyət siyasəti çərçivəsində gənclərin gələcəkdə peşəkar kimi formalaşmasına dəstək verir, onları inkişaf etməyə, bilik və bacarıqlarını üzə çıxarmağa yardım edir. Şirkət bu istiqamətdə Azərbaycan universitetlərində təhsil alan tələbələrin yeni texnologiyaları öyrənməsinə həvəsləndirmək məqsədilə müxtəlif layihələr də həyata keçirir.
