Gələn həftədən yuxarı siniflər və universitetlərdə ənənəvi tədris qismən bərpa olunur. İctimaiyyətdə belə bir narahatlıq var ki, tədris prosesinin bərpası yoluxma sayının artmasına, yenidən qapanmaya gətirib çıxara bilər.
Məsələyə münasibət bildirən ekspert Kamran Əsədov Modern.az-a deyib ki, təhsil prosesi nəhayət bütün pillələr üzrə bərpa edilməlidir:
“Biz bu açılmanı gözləyirdik. Təhsil Nazirliyi fevralın 1-dən ibtidai siniflər də tədrisi qismən bərpa etdi. Biz görürük ki, şagirdlər, müəllimlər, texniki işçilər arasında virusa yoluxan şəxslər var. Təhsil prosesi ona görə bərpa olunmalıdır ki, bu cür şəxslər təhsil müəssisəsinə daxil olan zaman müvafiq olaraq yoxlanılsın və əlamət müşahidə olunanlar təhsildən və cəmiyyətdən təcrid olunsunlar. Fevral ayının 8-dən isə V-IX-cu siniflər, 15-dən etibarən isə ali təhsil müəssisələrində tədris bərpa ediləcək.
Ali təhsil müəssisələrində öncə laboratoriya işi tələb edən fakültələr – yəni kimya, biologiya, fizika ixtisasında təhsil alanlar, eyni zamanda, bütün ali təhsil müəssisələrində tibb ixtisasında oxuyan tələbələr prosesə cəlb olunacaqlar.
IV-cü ixtisas qrupunda pedoqoji və istehsalat təcrübəsinə gedəcək şəxslərin də tədris prosesinə cəlb edilməsi gözlənilir. Humanitar yönümlü fakültələrdə oxuyan bəzi tələbələr var ki, onlara əlavə fənlər keçilir, məsələn, kimya, fizika və ya laboratoriya işi… Bu cür fakültələrin isə bərpası hələ gözlənilmir. Kənd təsərrüfatı ilə bağlı olan fakültələrdə tələbələr birbaşa praktika, laboratoriya işi verirlər, bu cür ixtisasların açılması gözlənilir. Təbii ki,praktika tələb edən dərslər də həftənin hər günü deyil, sadəcə, bir neçə gün keçiriləcək.
Tədris prosesində iştirak könüllülük prosesində həyata keçiriləcək, məcburi tələb deyil. Bu zaman ali təhsil müəssisələri alternativ proses yaratmalıdır. Bir məsələ də var ki, orta təhsil müəssisələrində çalışan müəllimlərin 37%-nin yaşı 50-dən yuxarıdır. Bu müəllimlərin məktəbə getməsi tövsiyə olunmur. Ali təhsil müəssislərində çalışanların isə böyük əksəriyyətinin, yəni 70%-nin yaşı kifayət qədər yuxarıdır. Hər kəsə maraqlı gələn məqam odur ki, bu cür müəllimlər tədris prosesinə necə cəlb olunacaq?
Yaşı yüksək olan müəllimlərin dərsdə iştirakı üçün müəyyən bir forma yaradılmalıdır. Ən azından ali təhsil müəssisələri həmin şəxsləri vaksinasiyaya cəlb etdikdən sonra auditoriyaya buraxa bilər. Düşünürəm ki, bu müddət ərzində bütün təhsil müəssisələrində dizinfeksiya işləri aparılmalıdır”.
Ekspert uşaq bağçaları ilə bağlı məsələdən də danışıb. Xatırladıb ki, 15 fevraldan özəl bağçalar fəaliyyətini bərpa edəcək:
“Bildiyimiz kimi, dövlət bağçalarının sayı Bakı, Abşeron, Sumqayıtda kifayət qədər çoxdur və burada şagird sıxlığı müşahidə olunur, bölgələrdə isə sıxlıq müşahidə edilmir. Əgər ciddi bir problem yaranmasa, mart ayının 1-dən etibarən digər ərazilərdə də bağçalar tam fəaliyyətə başlayacaq. Təcrübə bizə göstərdi ki, qapanma ilə hansısa uğur əldə edilə bilməz, əksinə, bu qapanmalar potensial daşıyıcıların və yoluxmuş şəxslərin gizlənməsinə, digər şəxsləri yoluxdurmasına səbəb ola bilir. Təhsil müəssisələri, bağçalar açılsa, bu cür şəxslər müvafiq yoxlamalar zamanı aşkar ediləcək və lazımi tədbirlər görüləcək. Hesab edirəm ki, biz heç bir halda yenidən qapanmaya getməməliyik, çünki bu halda biz uğur əldə edə bilmərik. Artıq vaksinasiya başlayıb və bir müddət sonra tam açılışa doğru gedə bilərik”.
