“Gələcək genişmiqyaslı layihələrin həyata keçirilməsi üçün həvəslə və böyük səylə fəaliyyətimizi davam etdirməkdəyik”.
Kulis.az xəbər verir ki, bu sözləri Beynəlxalq Türk Mədəniyyəti və İrsi Fondunun prezidenti Günay Əfəndiyeva Özbəkistanın tarixi Səmərqənd şəhərində keçirilən Türk Dövlətləri Təşkilatının Xarici İşlər Nazirləri Şurasının IX toplantısında çıxışı zamanı deyib.
“Zirvə çərçivəsində TDT-da sədrlik Özbəkistana təhvil verilir. Bu şərəfli və məsuliyyətli işin yerinə yetirilməsində Özbəkistana uğurlar arzu edirik. Əminik ki, Özbəkistan bu müddət ərzində həm qardaş türk dövlətləri, həm də Beynəlxalq Türk Mədəniyyəti və İrsi Fondu da daxil olmaqla, Türk Əməkdaşlıq Təşkilatları ilə bütün sferalarda əməkdaşlığın inkişafına töhfə verərək, bu vəzifənin öhdəsindən layiqincə gələcəkdir”.
Günay Əfəndiyeva türk xalqlarının qədim mədəni irsini öyrənən, qoruyan, dünya miqyasında təbliğini və təşviqini həyata keçirən rəhbərlik etdiyi təşkilatın fəaliyyətindən danışaraq, bildirib: “Fond gənc olmasına baxmayaraq, yarandığı tarixdən etibarən türk dünyasında mədəni bağların möhkəmləndirilməsi yönündəki müxtəlif layihələri ilə irəliləmiş, fərqli ölkələrdə təşkil etdiyi tədbirlər, konfranslar, dəyirmi masalar, yayımladığı kitablar ilə türk xalqlarının integrasiyası prosesində fəal iştirak etmişdir. Bu il təşkilatın büdcəsi təsdiqlənmiş və üzv ölkələrdən olan əməkdaşların təyin olunması ilə beynəlxalq heyət formalaşmışdır. Fond olaraq, üzv dövlətlər tərəfindən təşkilatın fəaliyyətinin dəstəklənməsi yönündəki bu mühüm addımları yüksək qiymətləndirərək, gələcək genişmiqyaslı layihələrin həyata keçirilməsi üçün həvəslə və böyük səylə fəaliyyətimizi davam etdirməkdəyik”.
Günay Əfəndiyeva Fond tərəfindən TDT-nın IX Zirvə Görüşü çərçivəsində Səmərqənddə həyata keçirilən layihələrin məqsədinin bu təqdirəlayiq hadisəyə töhfə vermək olduğunu bildirib: “Biz Səmərqənddə türk dövlətlərinin Böyük İpək Yolu üzərində əməkdaşlığına həsr olunmuş simpozium təşkil etdik. Fondun nəzdində yaradılan və 7 türk ölkəsinin qadın musiqiçilərindən ibarət “Yeddi gözəl” qrupu türk dünyasının əsrarəngiz musiqisini burada ilk dəfə nümayiş etdirir”.
Təşkilat tərəfindən il ərzində həyata keçirilən layihələr haqqında məlumat verən Günay Əfəndiyeva, qeyd edib: “Hər il olduğu kimi, bu il də Türk Dünyasının ümumbəşəri dəyərlərə əvəzsiz töhfələr vermiş böyük mütəfəkkirlərinin, yazıçılarının, musiqiçilərinin beynəlxalq aləmdə, o cümlədən Avropada tanıdılması yönündə Fond tərəfindən müxtəlif tədbirlər, konfranslar həyata keçirildi, eləcə də kitablar, poçt markaları və digər nəşrlər çap olundu. Bu çoxsaylı fəaliyyətlərə “Manas” dastanı ilə bağlı geniş araşdırmanın nəşri, Nizami Gəncəvi, Yunus Emre, Jambul Jabayev, Əlişir Nəvai, Ömər Seyfəddin, Mikloş Radnoti, Fikrət Əmirov, Azərbaycanın XII-XX əsrlərdə yaşamış bir çox görkəmi qadın şairələri, o cümlədən bu il 150 illiyi qeyd olunan Xurşidbanu Natəvanın yaradıcılığının təbliği və ildönümlərinin keçirilməsi daxildir.
Fikrət Əmirovun 100 illik yubileyi münasibətilə Sofiyada dahi bəstəkarın məşhur “Min bir gecə” baleti uğurla səhnələşdirildi. Vyanada “Türk dünyasını birləşdirən ədəbi körpü” adı altında silsilə tədbirlərdə Türk Dünyası mədəniyyəti almandilli oxuculara təqdim olundu. Varşavada təşkilatçılarından biri olduğumuz, Türkoloji Konqres çərçivəsində müxtəlif ölkələrdən türkoloq alimlər bir araya toplandı, türk ölkələrinin musiqiləri səsləndirildi”.
Günay Əfəndiyeva Fondun əsas məqsədləri sırasında türk etnik kökənli azsaylı xalqların tarixinin, mədəniyyətinin mühafizəsinin və təbliğinin yer aldığına toxunaraq, diqqətə çatdırıb: “Bu istiqamətdə biz Litva, Polşa, Rumıniya ilə əlaqələrimizi genişləndirmişik. Bu ilin əvvəlində Litvanın birinci xanımı Diana Nausedienenin iştirakı ilə Litvada yaşayan və ölkənin ən kiçik etnik qrupu olan karaimlərə həsr olunmuş sərgi keçirilmişdir. 2 həftə öncə, Litva karaimlərinin nümayəndələri Fondun tədbirlərində iştirak etmək üçün gəldilər, özünəməxsus zəngin irsini təqdim etdilər”.
Fondun prezidenti Şuşanın 2023-cü il Türk Dünyasının Mədəniyyət Paytaxtı seçilməsini nəzərə çatdıraraq, əlavə edib: “Bununla əlaqədar, biz bu ilin Mədəniyyət Paytaxtı qədim Bursada “Şuşa Günləri”nin keçirilməsini təklif etdik. Bu tədbir mədəniyyət paytaxtı statusunun bir şəhərdən digərinə ötürülməsi üzrə yeni ənənənin başlanğıcı olacaqdır. “Şuşa Günləri”nin təşkili tərəfimizdən ilin sonuna planlaşdırılıb”.
“Ümidvaram ki, Türk Əməkdaşlıq Təşkilatları olaraq, qarşılıqlı işbirliyinə əsaslanan fəaliyyətimizlə Türk dövlətləri arasındakı əlaqələrin genişlənməsinə, türk xalqlarının yaxınlaşmasına öz töhfəmizi verəcəyik” – deyə Günay Əfəndiyeva bildirib.
Çıxışın sonunda Fond tərəfindən nəşr olunan Azərbaycanın gənc şairi Fərid Hüseynin Özbəkistanın Səmərqənd və Xivə şəhərlərinə həsr etdiyi şeirlər kitabı tədbir iştirakçılarına təqdim olunub.
