Gəncə Regional Mədəniyyət İdarəsi Gəncə şəhər Heydər Əliyev Mərkəzi və Gəncə MKS-nin 16 nömrəli kitabxana filialı “Qəlbimizin zirvəsində yaşayan qəhrəman” mövzusunda Vətən Müharibəsinin Şəhidi Mustafayev Rüfət Zöhrab oğlunun ailəsi ilə görüş keçirdi.
Tədbirdə Şəhid Rüfət Mustafayevin ailə üzvləri, qohumları və yaxınları, Şəhid ailələri, Türkmən ədəbiyyatı Yazarlar birliyinin üzvü, Türkiyə Yedi bölge Şair Yazar ve Ozanlar Kültür Dərnəyinin Azərbaycan təmsilçisi şairə Esmira Günəş, Gəncə Regional Mədəniyyət İdarəsinin tabeliyində fəaliyyət göstərən müəssisələrin əməkdaşları, Əhməd Cavad adına 2 №-li tam orta məktəbin şagirdləri, Mirzə Abbas Abbaszadə adına 20 nömrəli tam orta məktəbin sinif müəllimi Şəhid Rüfət Mustafayevin sinif yoldaşı Rəvanə İbrahimova, 27 №-li məktəb liseyin şagirdi iştirak etdilər.
Tədbiri giriş sözü ilə açan Gəncə şəhər Heydər Əliyev Mərkəzinin direktor əvəzi İlknur İsgəndərova Vətən müharibəsində qəhrəmancasına döyüşmüş, Azərbaycan bayrağını işğaldan azad edilən torpaqlarımızda dalğalandırmış, ölkəmizin ərazi bütövlüyü yolunda canlarını fəda etmiş əsgər və zabitlərimizin qəhrəmanlığından bəhs etdi və tədbir iştirakçılarına Şəhid Rüfət Mustafayev haqqında məlumat verdi.
Gəncə Regional Mədəniyyət İdarəsinin məsləhətçisi Mürsəl İsmayıllı öz çıxışında qeyd etdi ki, hər bir Azərbaycan vətəndaşı öz şəhidlərini, qəhrəmanlarını tanımalı, onların keçdiyi həyat yolundan çox şeyləri öyrənməlidir. Ali Baş Komandanı Prezident İlham Əliyev zamanın da ən doğru qərarı qəbul etməklə xalqımızın tarixi qələbəsini təmin edib. Bu ölkənin vətəndaşı olaraq hər birimiz 44 günlük haqq savaşı boyunca bizlərə sevinc, fərəh, qürur dolu saysız-hesabsız qələbələr bəxş edən şəhidlərimizə, sağlamlığını itirən qazilərimizə, şanlı Azərbaycan Ordusunun əsgər və zabitlərinə ömür boyu minnətdar olmalıyıq.
Türkmən ədəbiyyatı Yazarlar birliyinin üzvü, Türkiyə Yedi bölge Şair Yazar ve Ozanlar Kültür Dərnəyinin Azərbaycan təmsilçisi şairə Esmira Günəş çıxışında Qələbəni, Azadlığı, Zəfər sevincini bizə yaşadan qəhrəman oğullarımıza borclu olduğumuzu vurğulayıb. Şairə İkinci Qarabağ müharibəsi şəhidləri Vətən üçün canından keçən Rüfət Mustafayevin əziz xatirəsinə həsr etdiyi ”Qəlbimizin zirvəsində yaşayan qəhrəman” kitabları haqqında məlumat verdi. Şairə tədbir boyu şeirlərini səsləndirdi.
Şəhidin sinif yoldaşı Rəvanə İbrahimova Rüfətlə bağlı məktəb xatirələrindən bəhs etdi. O, həmçinin qeyd etdi ki, çalışdığı məktəbdə dərs dediyi sinif otağı Şəhid Rüfətin adını daşıyır.
Şəhidin xalası Nəhayət Həsənova tədbir iştirakçılarına Rüfətin keçdiyi həyat yolundan, necə vətənpərvər, qayğıkeş övlad olmasından danışdı.
Gəncə MKS-nin 16 nömrəli kitabxana filialının kitabxanaçısı Tünzalə İsmayılova bu zəfərin xalqımızın birliyinin, həmrəyliyinin, əsgər və zabitlərimizin misilsiz qəhrəmanlıqlarının, respublikamızda yaşayan bütün xalqların Vətənin dar günündə bir nəfər olmasının və dövlətimizin başçısının polad iradəsinin, Müzəffər Ali Baş Komandan İlham Əliyevin qətiyyətinin, dəmir yumruğunun qələbəsi olduğunu iftixar hissi ilə nəzərə çatdırdı.
Tədbirdə Şəhid polkovnik Babək Səmidlinin bacısı, MEK-in “Qarabağ müharibəsi qəhrəmanları” fondunun müdiri Röksanə Səfərzadə tədbir iştirkaçılarını AMEA Mərkəzi Elmi Kitabxanasında (MEK) birinci və ikinci Qarabağ müharibəsi zamanı adları Azərbaycan xalqının şanlı tarixinə qızıl hərflərlə yazılmış Milli Qəhrəmanlarımızın, şəhid, qazi, və iştirakçılarımızın xatirəsini əbədiləşdirmək üçün yaradılan “Qarabağ müharibəsi qəhrəmanları” fondu ilə tanış etdi. Qeyd olundu ki, fondda Azərbaycan xalqının böyük oğlu, ulu öndər Heydər Əliyevin və Azərbaycan Respublikasının Prezidenti, Ali Baş Komandan İlham Əliyevin Qarabağ bölgəsində müxtəlif dövrlərdə çəkilmiş fotoşəkilləri, “Qarabağ Azərbaycandır!” guşəsində 50-ə yaxın müharibə iştirakçılarının fotoşəkilləri, onların şəxsi kitabxanalarından ailələri tərəfindən fonda hədiyyə olunan kitablardan ibarət kolleksiya, Azərbaycan Respublikasının Xəritəsi üzərində 3000-ə yaxın şəhid adlarının əks olunduğu “Zəfər memarları” güşəsi, Birinci və İkinci Qarabağ müharibəsi, Aprel və Tovuz döyüşləri zamanı 500-dən artıq şəhid, qazi və müharibə iştirakçılarının həyatı və fəaliyyət yolunu əks etdirən məlumatlar, şəxsi sənədlər, 1000-dən artıq kitab, qəzet, jurnal, məqalələr, sənədli və bədii filmlər toplanaraq oxucuların istifadəsinə verilib.
Tədbirdə Şəhid Bilal Qənbərovun bacısı Aidə Kərimova, Şəhid Abdulla Əhmədovun anası Validə Əhmədova və Şəhid Saleh Nuriyevin anası Rəmziyə Nuriyeva çıxış etdilər.
Tədbirdə həmçinin Sumqayıt Şəhidlər Xiyabanına virtaul ziyarət olundu. İsrafil Məmmədov adına 27 nömrəli məktəb-liseyin şagirdi Ömər Abdullayev, Əhməd Cavad adına 2 nömrəli tam orta məktəbin şagirdləri Səma Xəlilova, Sərxan Babayev, Mirzə Abbas Abbaszadə adına 20 nömrəli tam orta məktəbin şagirdi Sübhan Bədirov şairə Esmira Günəşin şəhid Rüfət Mustafayevə ithaf etdiyi şeirləri söylədilər.
Tədbirin sonunda Şəhidin anası Afət Mustafayeva tədbiri təşkil etdiyi üçün Gəncə Regional Mədəniyyət İdarəsi Gəncə şəhər Heydər Əliyev mərkəzinə minnətdarlığını bildirdi.
Müstəqil.Az
