Səbirli olun, Yeni Azərbaycan Partiyasının (YAP) siyahısı çox yaxın günlərdə açıqlanacaq.
Müstəqil.Az bildirir ki, bu sözləri Axar.az-a açıqlamasında YAP-ın Beynəlxalq əlaqələr komissiyasının katibi, millət vəkili Elman Nəsirov deyib. O bildirib ki, YAP-ın növbədənkənar parlament seçkilərində namizəd olacaq şəxslərin siyahısı yekunlaşmaq üzrədir:
“Hələ həftə bitməyib, çox yaxın günlərdə siyahı ictimaiyyətə təqdim olunacaq. Amma siyahının hansı gün açıqlanacağı barədə konkret məlumatım yoxdur. İndiyə qədər gözləmisiniz, bir neçə gün də gözləyin, siyahı açıqlanacaq. Bütün dairələr üzrə YAP-ın nümayəndələri dəqiqləşdirildikdən, proses başa çatdıqdan sonra İdarə Heyətinin iclasında yekun siyahıya baxılacaq və təsdiqlənəcək. Daha sonra siz təsdiqlənmiş siyahı ilə tanış olacaqsınız. Söhbət çox yaxın zamandan gedir. Bunun üçün xüsusi həyəcanlanmağa, “yubandı” deməyə ehtiyac yoxdur. Bütün bunları YAP-ın rəhbər şəxslərinin açıqlamalarında dediklərinə əsasən söyləyirəm. YAP deputatları bununla bağlı əlavə heç bir şey söyləyə bilməz”.
E.Nəsirov YAP-ın namizəd siyahısının dekabrın 27-də açıqlanacağı ilə bağlı yayılan məlumatlara da münasibət bildirib:
“Harada qeyri-rəsmi, bu məsələyə aidiyyəti olmayan şəxslərdən YAP-ın namizəd siyahısının açıqlanacağı tarixi eşitsəniz, inanmayın. Bu məlumatlar reallığı əks etdirmir. Necə ki bəzi saytlar guya YAP namizədi olan və olmayan şəxslərin siyahısını dərc edirlər. Bütün bunlar onların təxəyyülünün məhsuludur, populizm arxasınca qaçmaq niyyətindən başqa bir şey deyil. Bu nöqteyi-nəzərdən dəqiq tarix verilməsi də eynilə əsassız yanaşmadır. Dəqiq tarixi YAP rəhbərliyi söyləyəcək”.
Qeyd edək ki, YAP-ın mətbuat katibi Hüseyn Paşayev açıqlamasında YAP-ın növbədənkənar parlament seçkilərində namizəd olacaq şəxslərin siyahısının bu həftə ərzində açıqlanacağını söyləmişdi.
Müstəqil.Az
