Hamı bilir ki, kökəlməyin əsas səbəbi qidalanmadır. İnsan sərf etdikdən daha çox kalori qəbul edirsə, bu, təbii ki, kökəlməyə səbəb olur.
Lakin elmi araşdırmalar göstərir ki, bu tək səbəb deyil.
Müstəqil.Az saglamolun.az-a istinadən bildirir ki, stress və yuxunun az olması kökəlməyin digər əsas səbəblərindəndir.
Stress zamanı qanda qlükozanın miqdarı artır. Bu orqanizmin təbii qoruyucu mexanizmidir. Onu həmçinin “döy və ya qaç” mexanizmi adlandırırlar. Hər iki halda (döyəndə və ya qaçanda) insan fiziki güc, enerji sərf etməlidir. Bu enerjini insan orqanizmin əsas “yanacağı” olan qlükozadan alır.
Qədim əcdadlarından fərqli olaraq müasir insan stressə düşəndə əksər hallarda nə döyür, nə də qaçır, əksinə oturur və ya uzanır. Nəticədə enerji sərf olunmur və mədəaltı vəz qandakı qlükozanı normaya salmaq üçün insulinin ifrazını artırır. İnsulinin səviyyəsi artdıqca insan aclıq hiss edir və yemək yeməyə başlayır. Beləliklə orqanizm ona lazım olmayan kalorilər alır.
Müasir insanların bir çox hissəsi xroniki stress şəraitində yaşadıqdan yuxarıda təsvir etdiyimiz vəziyyət daim təkralanır və nəticədə insan artıq çəki yığır. Bundan əlavə bu həmçinin şəkərli diabetin riskini də artırır.
Alimlər bu vəziyyətdən çıxış yolunu fizki aktivlikdə görür. Stress vəziyyətinə düşmüsünüzsə, onu passiv şəkildə yaşamayın. İdman zalına yollanın. Buna imkan yoxdursa, gəzməyə çıxın, hər hansı ev işi ilə məşğul olun. Fiziki aktivlik həm qanda stress hormonlarının, həm şəkərin səviyyəsini azaldır. Nəticədə həm sinir sistemimiz daha az ziyan görür, həm aclıq bizə “güc gəlmir”.
Müstəqil.Az
