KİRKİRƏ İŞTAHASI
– Ehtiyacım yox suya,
Ehtiyacım yox pərə.
Daşı da üyüdərəm! –
Söyləyirdi Kirkirə…
Bu lovğa Kirkirənin,
Böyük idi istəyi.
Etibarlı əldəydi,
Çünki onun dəstəyi…
MİŞAR
Mişar çoxlu Taxtanı,
Kəsmişdi neçə kərə.
Bitili Palıdı da
Kəsib yıxmışdı yerə…
Köhnə taxtanı isə,
Görüb, geri durmuşdu.
…Bir vaxt mismarlı Taxta,
Dişini sındırmışdı!..
RƏQABƏT
İki Qoç yerli-yersiz,
Toqquşurdu hər zaman.
Bir-birini yıxmağa,
Can atırdı durmadan…
…Buynuzlar tab etmədi,
Buynuzlar qopub düşdü, –
Onlar yenə doymadı.
Uzun sözün qısası,
Bu iki Qoçun başı,
Bir qazanda qaynadı…
KƏRTƏNKƏLƏ
Çəmənliyə göndərdilər,
Çəmənliyə uyğunlaşdı –
yaşıllaşdı.
Çınqıllıqda iş verdilər,
Boz don geydi –
uyğunlaşdı.
Gah ağaca dırmandı,
Gah ilan tək süründü.
Məqsədinə çatmaq üçün,
Yüz kələyə büründü…
Fəqət, bir gün keçdi ələ,
Quyruğunu qoyub, qaçdı
Kərtənkələ, Kərtənkələ…
SAC
Sac hər zaman deyirdi:
– Bilin, “Bala Günəşəm!”
Hərarət mənbəyiyəm, –
Şəfa yaymaqdır peşəm…
…Kimə gərək olsaydı,
Sac dayaq axtarırdı.
Hey düşüb əl-ayaqdan,
Sacayaq axtarırdı…
DÖRD RƏNGLİ QƏLƏM
O, istəsə yüz sözü,
Bir ahənglə yazırdı.
İstəsə bir kəlməni,
Düz dörd rənglə yazırdı…
Sən demə yalanları,
Qırmızı yazan oymuş.
Düzü göyə, yaşıla,
Qaraya yozan oymuş.
Arxada böhtan yazıb,
Üzlərə gülən imiş.
Dörd sözlü, dörd sifətli,
Dörd rəngli Qələm imiş…
MALA VƏ DİVAR
Əyri Divar
Malanın,
Yolunu gözləyirdi…
Çünki bu Mala onun Eybini gizləyirdi!..
QANQAL
Güllərin cərgəsində,
Bircüt Qanqal bitmişdi.
Güllərin cərgəsində,
Bir cüt Qanqal itmişdi!..
TÜL PƏRDƏ
Ömrü boy pərdəlik
Etməsə də Tül Pərdə –
Pərddən də qabaqda,
Asılırdı
hər yerdə…
TOP
Atsalar da Divara,
Vursalar da Dirəyə, –
Onlardan üz çevirib
Topdönürdü geriyə…
XƏLBİR
Taxıla qarışmışdı
Alaqotu toxumu.
Hamı elə bilirdi,
O, Taxılın doğmaca,
Qohumudur, qohumu.
Tezliklə o, çuvalda,
Taxılla dilbir oldu…
(Yaxşı ki Xəlbir varmış!..)
O xəbisi axtaran,
Arıyan Xəlbir oldu,
Onu təmiz taxıldan,
Ayıran Xəlbir oldu!..
FIRÇA
Fırça Daşa, Divara
İncə naxış vururdu.
Adi, cansız Kağıza,
Yeni həyat verirdi.
Ancaq hamı qorxurdu,
Onun bir əməlindən;
(Ləkə yaxmaq gəlirdi,
Axı həm də əlindən!..)
ƏRKÖYÜN BALA
Bir Kenduru balası,
Keçdi qlın kollardan.
Enli yarağanlardan,
Təhlükəli yollardan…
…Ancaq bunun səbəbi,
Sirr deyil bir kəsə də.
Axı, anası onu,
Gəzdirirdi kisədə!..
CİB FƏNƏRİ
Qaranlıq bir gecədə,
Söylədi Cib Fənəri:
-Məni əvəz etməyə,
Kimin çatar hünəri?!
Heç Ay da məmim qədər,
Şəfəqlər saça bilməz.
Ulduzlar yüz il yansa,
Səhəri aça bilməz…
…Özünün aləmində,
O, sönməz Günə döndü.
Gecə yarı olmamış,
Zəiflədi və… söndü.
BIÇAQLAR
Bıçaq dedi Bıçağa:
-Tək əldən də səs çıxar?!
Gəl birləşək,
birləşsək,
Gücümüz lap dağ yıxar.
Birləşdilər…
Onların
Taleyi acı oldu.
İki Bıçaq bir anda,
Çevrilib, Qayçı oldu…
ÇƏRPƏLƏNG
Yerdən azca qalxaraq,
Belə dedi Çərpələng:
-Yerlərə sığışarmı,
Mənim kimi bir nəhəng?!
İstəsəm, gecə-gündüz,
Səmalarda süzərəm.
İstəsəm, lap Günəşin
Qarşısını kəsərəm.
Bulud tək boşalaram,
Bulud kimi dolaram
Mən öz sərin kölgəmi,
Səhralara salaram.
Uca-uca dağları,
Saxlayaram kölgədə.
Mən olmasam quruyar,
Göllər, çaylar, bəlkə də…
Özündən razı-razı,
Öyünsə də bu “nəhəng”,
Bircə sapla torpağa
Bağlı idi Çərpələng !..
MƏQALƏ
Çil Toyuğun haqqında,
Bir məqalə yazdı Qaz:
– Dolaşsanız dünyanı,
Belə Toyuq tapılmaz.
Yoxdur ona bərabər,
Nə fermada, nə hində.
İldə dörd yüz yumurta,
Yumurtlayır bu sində…
…Müəllif əsas mətləbi,
Heç salmırdı yadına.
Üç fərə işləyirdi,
Çil Toyuğun adına!..
İSGƏNDƏR FƏRHADOĞLU
Müstəqil.Az
