“Hələ ki, böyük uğurlardan söz açmaq üçün çox tezdir”.
Bu sözləri Qaynarinfo-ya yeni yaradılan Dənizçilərin Hüquqlarının Müdafiəsi İctimai Birliyinin təşkilatçısı, gəmi kapitanı Faiq Balabəyli deyib.
Bununla belə, o, qurumun dənizçilər arasında böyük marağa səbəb olduğunu bildirib: “Qurumun yeni yaranmasına baxmayaraq, bizə xeyli müraciətlər ünvanlanmağa başlayıb. Müraciətlər günü-gündən də artır. Hələlik qurumun yerləşdiyi ofis və ünvan olmadığından müraciətlər zənglər və elektron ünvana göndərilməklə edilir. Araşdırdığımız şikayətlərin bir çoxunun həllinin mümkün olması qənaətindəyik. Əsasən mənzil problemlərinin həlli ilə bağlı şikayətlər olur. Elə məsələlər də var ki, bunların heç də ADXG QSC və digər dənizçilik şirkətlərinə aidiyyatı yoxdur. Başqa dövlət qurumları tərəfindən süründürməçiliyə səbəb olan hallar da var ki, DHM İB olaraq həmin məsələnin həlli istiqamətində müraciətlərimiz olub və müsbət həllini tapıb. Artıq gələcəyin dənizçiləri – Azərbaycan Dövlət Dənizçilik Akademiyasının bir neçə tələbəsi də İB dən kömək istəyib və tərəfimizdən Dəniz Akademiyasının müvafiq sahələrindəki səlahiyyət sahibləri ilə aparılan danışıqlar, əsasən istehsalat təcrübəsində olan tələbələrin müraciətlərinin müsbət həll olunmasına səbəb olub”
Qaynarinfo
