Litva Avropada Təhlükəsizlik və Əməkdaşlıq Təşkilatının (ATƏT) Parlament Assambleyasının (PA) fevralın sonunda Vyanada keçiriləcək sessiyasını Rusiya nümayəndələrinin iştirakına icazə verildiyinə görə boykot edəcək.
Bu barədə jurnalistlərə ATƏT PA-da Litvanın nümayəndə heyətinin rəhbəri Viliya Aleknayte-Abramikene bildirib.
“Bizim yekun mövqeyimiz sessiyada iştirak etmək deyil. Avstriya hökumətinin Rusiya nümayəndələrinə viza verilməsi ilə bağlı qərarı hələ rəsmən təsdiqlənməyib, lakin qeyri-rəsmi kanallar vasitəsilə biz onlara müraciət edən hər kəsin viza alacağını öyrəndik”, – o deyib.
Vilnüs Baltikyanı ölkələri, şimal dövlətlərini və Polşanı Rusiya Federasiyasının nümayəndələrinin iştirakına icazə verildiyi halda ATƏT PA-nın sessiyasında iştirakla bağlı ümumi mövqe tutmağa çağırıb.
Mənbə: TASS
