Qəbələdə yanacaqdaşıyan maşın iki avtomobilə dəyərək körpüdən aşıb, ölən var.
Daxili İşlər Nazirliyinin Mətbuat Xidmətinin Şəki regional qrupundan verilən məlumata görə, bu gün saat 11:30 radələrində 1960-cı il təvəllüdlü Məhərrəm Quliyev idarə etdiyi “Mercedes-Benz” markalı yanacaqdaşıyan yük avtomobili ilə Qəbələ rayonunun Vəndam qəsəbəsi ərazisində hərəkətdə olarkən idarəetməni itirib və nəticədə nəqliyyat vasitəsi əvvəlcə yolun kənarındakı iki minik avtomobilinə dəyib, daha sonra isə körpüdən aşıb.
Hadisə yerinə dərhal polis və Fövqəladə Hallar Nazirliyinin əməkdaşları cəlb olunub, zəruri təhlükəsizlik tədbirləri görülüb. Avtomobildə sıxılı vəziyyətdə qalan M.Quliyevin meyiti çıxarılaraq aidiyyəti üzrə təhvil verilib.
Faktla bağlı araşdırma aparılır.
16:18
Qəbələ rayonu, Vəndam qəsəbəsi ərazisində qəzaya düşmüş yük avtomobilinin sürücüsünün cəsədinin çıxarılması üçün Fövqəladə Hallar Nazirliyinin əməkdaşları hərəkətə keçiblər.
Bu barədə FHN məlumat yayıb.
Nazirliyin qüvvələri tərəfindən xüsusi xilasetmə vasitələrindən istifadə etməklə avtomobildə sıxılı vəziyyətdə qalan sürücünün meyiti çıxarılaraq aidiyyəti üzrə təhvil verilib.
Ərazidə müvafiq təhlükəsizlik tədbirləri görülür.
15:15
Qəbələdə çoxtonnajlı benzindaşıyan avtomobil körpüdən aşıb.
APA xəbər verir ki, hadisə nəticəsində Naxçıvan Muxtar Respublikası Şahbuz rayon sakini, 1960-cı il təvəllüdlü sürücü hadisə yerində dünyasını dəyişib.
Hazırda Fövqəladə Hallar Nazirliyinin şimal-qərb regional idarəsinin nümayəndəsi və polis əməkdaşları hadisə yerindədirlər. Hadisəyə sürücünün qəfil ürəktutmasından dünyasını dəyişməsinin səbəb olduğu ehtimal edilir. Qəza zamanı iki sərnişin avtomobilinə də ciddi ziyan dəyib.
Faktla bağlı araşdırma aparılır.
