Azərbaycan Milli Elmlər Akademiyası Nizami Gəncəvi adına Ədəbiyyat İnstitutunda Özbəkistan Respublikasının Azərbaycandakı fövqəladə və səlahiyyətli səfiri Bəhram Əşrəfxanov və səfirliyin attaşesi Aybek Əkrəmovla görüş keçirilib. Görüşdə İnstitutun Azərbaycan-Türkmənistan-Özbəkistan ədəbi əlaqələri şöbəsinin müdiri, filologiya elmləri doktoru Almas Binnətova, filologiya üzrə fəlsəfə doktorları Aygün Bağırlı və Mehman Həsənli iştirak ediblər. Azərbaycan-Özbəkistan ədəbi-mədəni əlaqələrinin gələcək planları müzakirə olunub.
AMEA-nın vitse-prezidenti, Ədəbiyyat İnstitutunun direktoru, akademik İsa Həbibbəyli görülmüş işlərdən danışıb. Qeyd edib ki, fevral ayında Nizami və Nəvaiyə həsr olunmuş konfransdan əlavə Babura həsr edilmiş konfrans da təşkil olunub. 2019-cu ildə İnstitutda “Azərbaycanca-özbəkcə, özbəkcə-Azərbaycanca lüğət” kitabının təqdimat mərasimi keçirilib. 2020-ci ildə Ədəbiyyat İnstitutunun Elmi şurasının qərarına əsasən Azərbaycan və özbək dillərində çap olunan Əlişir Nəvainin “Hikmətli sözlər” əsərinin elmi redaktoru oluğunu əlavə edib. 2020-ci ildə İnstitutda Özbəkistan Respublikasının Azərbaycandakı səfirliyi və Əlişir Nəvai adına Daşkənd Dövlət Özbək dili və ədəbiyyatı Universiteti ilə birlikdə Əlişir Nəvainin anadan olmasının 579 illiyinə həsr olunmuş “Əlişir Nəvai ədəbi və elmi irsinin öyrənilməsi” adlı Beynəlxalq elmi konfrans keçiriliyini də xatırladıb. “Müqayisəli ədəbiyyatşünaslıq” Beynəlxalq elmi jurnalının Azərbaycan-özbək ədəbi əlaqələrinə həsr olunmuş xüsusi buraxılışı haqqında məlumat verib.
Səfir Bəhram Əşrəfxanov görülən işlərin davamlı olacağını bildirib və beş cildlik “Özbək dilinin izahlı lüğəti”ni İnstituta hədiyyə edib. Ədəbiyyat İnstitutunda Əlişir Nəvai adına Ədəbiyyatşünaslıq Mərkəzinin yaradılmasını yüksək qiymətləndirib və oranı ziyarət edib. Filologiya elmləri doktoru Almaz Ülvinin “Əlişir Nəvainin əsri və nəsri” adlı kitabından söz açaraq kitabın təqdimatının nəzərdə tutulduğunu bildirib.
Gülnar Səma
Nizami Gəncəvi adına Ədəbiyyat İnstitutu,
İctimaiyyətlə əlaqələr şöbəsi
