Bakıda xarici ölkə vətəndaşlarının bank kartlarından külli miqdarda pul oğurlamaqda təqsirli bilinən Pakistan vətəndaşı, Azərbaycan Rəssamlıq Akademiyasının tələbəsi Mustafa Ghulama hökm oxunub.
“Qafqazinfo” xəbər verir ki, Bakı Ağır Cinayətlər Məhkəməsində keçirilən prosesdə 1996-cı il təvəllüdlü M.Ghulam Cinayət Məcəlləsinin 177.3.2-ci (Oğurluq-külli miqdarda ziyan vurmaqla) maddəsi ilə təqsirli bilinib.
Məhkəmə araşdırması zamanı bildirilib ki, pakistanlı tələbə əlbir olduğu və xaricdə yaşayan cinayətkar qrup üzvləri ilə birgə ABŞ, Kanada, Honq-Konq və Kolumbiya banklarının müştərilərinə aid bank kartı məlumatlarını qanunsuz əldə edib.
Daha sonra Bakıda yaşayan Mustafa həmin bank kartı məlumatları əsasında onlayn satış həyata keçirən mağazalardan alış-verişə başlayıb.
O, bir neçə mağazalardan ümumilikdə dəyəri 228 418 manat olan bahalı əşyalar, qol saatları, telefonlar və digər məhsullar alıb və kuryer xidməti vasitəsilə həmin malları əvvəlcədən tutduğu evə gətizdirib. Bir neçə ay əvvəl isə M. Ghulam həmin malları metronun “Neftçilər” stansiyası yaxınlığındakı mağazalara dəyərindən ucuz qiymətə satıb.
Daxil olmuş şikayətlər əsasında DİN-in Baş Mütəşəkkil Cinayətkarlıqla Mübarizə İdarəsinin Əməkdaşlarının həyata keçirdiyi əməliyyatla pakistanlı gənc saxlanılıb.
Bakı Ağır Cinayətlər Məhkəməsinin 3 avqust 2022-ci il tarixli hökmü ilə ona 7 il 6 ay müddətinə həbs cəzası verilib.
