ABŞ-da yaşayan sabiq spiker Rəsul Quliyev də ordumuzun Şuşanı işğaldan azad etməsinə sevincini və heyrətini gizlədə bilməyib.
Müstəqil.Az xəbər verir ki, 8 noyabrın Azərbaycan tarixində ən yaddaqalan günlərdən biri olduğunu vurğulayan R.Quliyev 27 sentyabrda, müharibə başlayanda Azərbaycan Ordusunun Şuşaya qədər gedəcəyinə inanmadığını bildirib:
“Ona görə yox ki, ermənilərin güclü olduqlarından narahat idim. Əksinə, ermənilərin heç vaxt güclü ordusu, vuruşan əsgəri olmayıb. İnanmağımın səbəbi o idi ki, Ermənistanı Minsk Qrupunun dəstəkləməyindən, Azərbaycana təzyiqindən qorxurdum”.
Sabiq spiker deyib ki, Minsk Qrupunun hər 3 dövləti əslində bu təzyiqi göstərdi:
“Ancaq Prezidentin qətiyyətini sındıra bilmədilər. Və 20 gün ərzində Prezident dərin analizləri ilə, dünyanın məşhur TV-lərinə verdiyi müsahibələrlə problemin mahiyyətini bütün ölkələrin rəhbərlərinə və xalqlarına çatdıra bilmişdi. Azərbaycana münasibət dəyişirdi”.
İkinci faktor olaraq Türkiyənin və Prezident Ərdoğanın birmənalı dəstəyini göstərən R.Quliyev sonda qeyd edib:
“Bu tarixi günün baş tutduğuna görə Azərbaycan əsgərinə, Ali Baş Komandana dərin minnətdarlığımı bildirirəm. Azərbaycan bölünməzdir, Azərbaycan sarsılmazdır”.
Müstəqil.Az
