“Əli İnsanov çoxdandır ki, Ramiz Mehdiyevlə bir yerdədir…”
Azərbaycan Milli Elmlər Akademiyasının (AMEA) prezidenti, Prezident Administrasiyasının sabiq rəhbəri Ramiz Mehdiyevlə bağlı açılan müzakirələr davam etməkdədir. Mehdiyevin onu tənqid edənlərin dediklərinə reaksiyası isə bu müzakirələrə əlavə rəng qatıb.
R.Mehdiyevə ilk hücuma keçənlərdən biri, Ana Vətən Partiyasının sədri, deputat Fəzail Ağamalının fikirlərini öyrənmişik.
– Fəzail bəy, Ramiz Mehdiyev özünə qarşı irəli sürülən ittihamlara cavab verib. Bu cavabı necə qiymətləndirirsiniz?
– Əgər buna “cavab” demək mümkündürsə, mən həmin cavabla tanış oldum. Çox bəsit və məntiqsiz cümlələrdən ibarət olan açıqlamasında ona qarşı irəli sürülən ittihamların heç birinə arqument və fakt əsasında cavab verə bilməyib. Ümumi söz yığınından ibarət cavab idi, guya bunun hədəfə alınması kiməsə lazımdır… Buradan çıxarılan məntiq ondan ibarətdir ki, bunun hakimiyyətlə problemləri var. Ortaya məhz belə məntiq, qənaət gəlir. Həmçinin cavab reaksiyasında “müxalifət mövqeli insanlar var” ifadəsini işlədir və böyük ehtimalla məni nəzərdə tutur. Eyni zamanda vəzifədən çıxarılmış, “vurulmuş” insanları nəzərdə tutur. Məsələn, Maksim Musayevi və Eldar Namazovu. Bir daha vurğulayıram ki, çox məntiqsiz və savadsız cavab idi.
– Elə isə gəlin konkretləşdirək, hazırda Sizin və digər şəxslərin Ramiz Mehdiyevin üzərinə getməyinizin səbəbi nədir?
– 2003-cü ilin prezident seçkiləri ərəfəsində Heydər Əliyevin səhhətində problemlər yarananda və ulu öndər o zaman ABŞ-ın Klivlend klinikasında müalicə alanda, Ramiz Mehdiyev yaranan situasiyadan istifadə edərək, Heydər Əliyevdən sonra hakimiyyətə gəlmək iddiasını ortaya qoydu. Ancaq bunu açıq və səmimi şəkildə etmədi. Mənsub olduğu komanda daxilində separatçı mövqe tutaraq, istəyinə nail olmağa çalışdı. Əgər belə demək mümkündürsə, komanda düzəldərək onun əli ilə ictimai rəyə özünü sırımağa başladı. O zaman Heydər Əliyev haqqında yaramaz yazıların hamısı mətbuata onun vasitəsilə ötürülürdü.
Digər tərəfdən, həmin dövrdə Rusiya mətbuatı Ramiz Mehdiyevi yüksək səviyyədə təqdim edir, onu Heydər Əliyevdən sonra Azərbaycan siyasətində ikinci şəxs kimi önə çıxarırdı. Bizə 2003-cü il prezident seçkilərində müstəqil, mötəbər mənbələrdən məlumatlar daxil olurdu ki, R.Mehdiyev həm də müxalifətlə işləyir, müxalifətlə işbirliyinə gedərək, hakimiyyəti ələ almağa çalışır. Ulu öndərin bir köməkçisi bu işdə çox önəmli rol oynayırdı. Hələ də Prezident Administrasiyasında çalışan Qafar Əliyev müxalifətlə R.Mehdiyev arasında koordinator rolunda çıxış edirdi.
Ramiz Mehdiyevin xəyanət xarakterli niyyəti, müxalifətlə aparılan danışıqlarla bağlı 2001-ci ilin sentyabrında “Neytral”, “Yeni Müsavat” və digər qəzetlərdə çoxsaylı müsahibə və açıqlamalarım getdi. İsrarla R.Mehdiyevin gizli planları üzərində dayandım, bütün yazı və müsahibələrimdə Heydər Əliyevdən sonra Azərbaycanda prezidentliyə ən layiqli namizəd kimi İlham Əliyevin adını önə çəkdim. Beləliklə, biz, Ramiz Mehdiyevin üzərinə getdik, maskalar cırıldı, pərdələr açıldı. Sözsüz ki, hakimiyyətdə dövlətçilik mövqeyində dayanan və ulu öndərin ideyalarına sadiq insanlar da, Heydər Əliyevin dövlətçilik kursunun davamlı olması üçün haqlı olaraq İlham Əliyev amili üzərində dayandılar.
– Dediklərinizdən belə çıxır ki, Ramiz Mehdiyev 2003-cü ildə prezident olmaq niyyətində idi…
– Ramiz Mehdiyev 2003-cü ildə pezident seçkilərində özünü ehtiyat namizəd kimi təsbit etməyə çalışırdı. Əsas gətirirdi ki, İlham Əliyevlə bağlı problem yarandıqda Ramiz Mehdiyev prezidentliyə namizəd kimi təqdim edilir və seçkilərdə iştirak edir. Bunun da qarşısı alındı. Bu deyilənlərin hamısı faktdır və uzaq keçmiş deyil.
Seçkilər bitdi. Ancaq sonrakı proseslərin içində rol alan Mehdiyev faktiki olaraq əlində ciddi şəkildə hakimiyyət toplamağa, özünün hakimiyyət piramidasını yaratmağa çalışdı və müəyyən qədər buna nail oldu. Çünki ölkə keçid dövrünü yaşayırdı, kifayət qədər problemlər içərisində idik, dövlətin qarşısında torpaqlarını işğaldan azad etmək kimi tarixi missiya dururdu, Prezidentin enerjisinin mütləq əksəriyyəti dövlətimizin beynəlxalq nüfuzunun artmasına və erməni işğalına qarşı yönəlirdi. O isə bax, belə çətin durumdan bəd niyyətləri üçün istifadə etməyi bacardı.
Soruşmaq lazımdır ki, yaxşı, Siz artıq Prezident səviyyəsində qəbul edildiniz, yüksək ordenlə təltif olundunuz, ömür boyu arzuladığınız prezident titulunu tərcümeyi-halınıza yazdırdınız. Hansı ki, yaxşı olardı 82 yaşınızda gedib evdə oturub istirahət edərdiniz.Təkidlə AMEA-nın prezidenti olmaq istədiniz. Prezident də yüksək humanistlik göstərərək bu vəzifəni Sizə verdi, yüksək mükafatla təltif etdi. O isə minnətdarlıq əvəzinə, AMEA-dakı kabinetini anti-dövlət qərargahına çevirdi. Ən müxtəlif adamları ora dəvət edir, onları hakimiyyətə qarşı səfərbərliyə alır, sözünə baxmayanların üzərinə gedir, dövlətçiliyə qarşı komanda formalaşdırmağa çalışır. Deməli, sifarişləri yerinə yetirir, əməldə Azərbaycan dövlətçiliyinə qarşı çıxır. Sözdə isə Heydər Əliyev ideyalarına, İlham Əliyevə sədaqətlə xidmət etdiyini riyakarcasına qeyd edir. Olmaz belə!
Dövlətçiliyimizin zəifləməsinə uzanan xain əllər və niyyətlər heç bir halda ictimai rəydə, ictimai-siyasi proseslərdə müdafiə olunmamalıdır. Hərçənd ki, bunu Musa Musayev, deputat Aydın Mirzəzadə kimi savadsız şəxslər müdafiə edirlər. Xalqımız azadlıq və milli dövlətçilik yolunda qan töküb, biz 20 Yanvar faciəsindən, Xocalı soyqırımından keçib gəlmişik, müstəqilliyimiz və ərazi bütövlüyümüz uğrunda 20 min şəhid vermişik. Ona görə də, kin-küdurət, bitib-tükənməyən ambisiyalar, ayrı-ayrı dövlətlərin maraqlarına xidmət edən məkrli və xain ünsürlərə qarşı barışmaz mövqe nümayiş etdirməliyik, onları ictimai rəydə sıfırlamalıyıq, onların səlahiyyətlərindən istifadə edərək törətdikləri cinayətlər açılmalıdır. Ayrı-ayrı adamların mənimsənilən mülkiyyətləri geri qaytarılmalıdır!…
– Yaxşı, bəs sizcə 82 yaşlı bir şəxsin gələcəklə bağlı planları nədən ibarətdir?
– İlk olaraq, R.Mehdiyev ölkənin birinci şəxsi ola bilmədiyini heç kimə bağışlamır, çox kinlidir, məkrlidir, hədsiz iddialıdır. Bitib-tükənməyən ambisiyaları onu rahat yaşamağa qoymur.
İkincisi, bu gün Ramiz Mehdiyev Azərbaycanı zəiflədib, öz təsiri altına almaq niyyətində olan xarici qüvvələrin təsiri altında “beşinci kolon” missiyasını yerinə yetirməkdə davam edir. Bu missiyanı çox kobud və effektsiz şəkildə həyata keçirməsinə baxmayaraq, onu hələ də kölə psixologiyası ilə davam etdirir və üzərinə götürdüyü rezident öhdəliklərinə son dərəcə sadiqdir.
– Müşahidələr göstərir ki, ictimai rəy heç zaman Ramiz Mehdiyevi birinci şəxs kimi qəbul etməyib. Belə olan halda Mehdiyev nədən böyük riskə gedərək heç vaxt çata bilməyəcəyi iddialara düşsün?
– Bəli, cəmiyyət onu qəbul etmir, amma onun xarici dövlətin yüksək səviyyəli qurumları qarşısında öhdəlikləri var və o, bunu həyata keçirməkdədir. Digər tərəfdən, şəxsi keyfiyyətlərinin eybəcərliyi də onu əsir edib.
– Demək istəyirsiniz ki, Mehdiyev öz xalqına deyil, xarici ölkələrə arxalanaraq ortaya belə iddialar qoyur. Axı 82 yaşlı bir insana necə stavka etmək, onun məchul perspektivini görmək olar?
– Əslində, bu gün R.Mehdiyevi idarə edən xarici dairələrdə də vəziyyət fərqlidir. Yəni oralarda da dəyişikliklər gedir, situasiya fərqlidir, münasibətlər sistemində ciddi yeniliklər ortaya çıxır. Eyni zamanda, bu gün Azərbaycanın ayrı-ayrı dövlətlərlə yüksək səviyyəli münasibətləri qurulub.
Ramiz Mehdiyev kimi adamlara xidmət etdikləri dövlətlərin hər zaman ehtiyacı var. Əlbəttə, söhbət R.Mehdiyevin perspektivindən yox, onun illərdən bəri həm də, ermənilərin maraqlarına xidmət edən əməllərinin davamlı olmasından gedir.
– Belə niyyətləri olan adam müxalifətlə işbirliyinə gedə bilərmi və getsə nə olar?
– Ramiz Mehdiyevin müxalifətlə işbirliyi təkzibolunmaz faktdır. Baxın, indi radikal deyilən müxalifət nədən küçələrdə anarxiya yaratmır?! Eyni zamanda, onun xaricdə Azərbaycan dövlətçiliyinin üzərinə gələn, cənab Prezident və ailə üzvləri haqqında əxlaqsız, mənəviyyata sığmayan fikirlər söyləyən insanlarla əməkdaşlığını da istisna etmirəm. Çünki bu da milli dövlətçiliyə qarşı fəaliyyətin bir qoludur.
– Sizcə, Mehdiyev və hakimiyyətdən uzaqlaşdırılan “köhnə qvardiya” islahatlara maneə yarada, onu sabotaj edə bilərmi?
– Maneçilik yaratmaq imkanları güclü deyil, amma niyyətləri var. Bu niyyət həm də sosial şəbəkələrdə özünü ifadə etməkdədir. Bu niyyət, eyni zamanda, Mehdiyevin ən müxtəlif səbəblərdən hakimiyyətdən uzaqlaşdırılan insanları öz ətrafına yığmaq cəhdlərindədir, onun vaxtilə hakimiyyətin müxtəlif qollarında yerləşdirdiyi insanları öz ətrafında cəmləşdirmək üçün onlara göstərdiyi təzyiqlərdədir. Sübut etməyə çalışır ki, o, Prezident Administrasiyasının rəhbəri vəzifəsindən getsə də, yenə söz sahibidir, güclü təsir imkanlarına malikdir.
Əslində biz, bu fikir və açıqlamalarımızla həm də, R.Mehdiyevin köməyilə bu və ya digər vəzifəyə təyinat almış insanlara demək istəyirik ki, ondan xilas olun, dövlətçiliyimizə şərəflə və vicdanla xidmət edin, artıq Ramiz Mehdiyev erası bitib. Onun avantürasına getməyin, ondan uzaqlaşın. Açılan müzakirələrdən, verilən şərhlərdən sonra R.Mehdiyev cinahında olanlar ondan uzaqlaşmalı və dövlətçiliyimizin yanında olmalıdırlar. Bizim dediklərimizin fəlsəfəsində və qayəsində həm də bu məqsəd dayanır.
– Necə düşünürsünüz, Əli İnsanovla Ramiz Mehdiyev arasında əlaqələr varmı?
– Əli İnsanov çoxdandır ki, Ramiz Mehdiyevlə bir yerdədir. Bu, açıq görünür. Və Əli İnsanov da bir müddət öncə verdiyi açıqlamada Mehdiyevlə birlikdə olduğunu ortaya qoydu.
– Hər halda, Ə.İnsanov savadlı adamdır, görmürmü ki, cəmiyyətdə Ramiz Mehdiyevə qarşı münasibət necədir?
– Onları birləşdirən məslək, əqidə deyil, məkrli maraqlardır. Hər ikisinin İlham Əliyev amilinə qısqanc, qəbuledilməz münasibətləri var. Mehriban xanımın önə çıxması, dövlətçiliyimizə verdiyi əhəmiyyətli töhfələr R.Mehdiyev-Ə.İnsanov cütlüyünün həyatını və düşüncələrini alt-üst etməkdə, onların anti-milli maraqlarının üstündən xətt çəkməkdədir.
– Bir neçə gün əvvəl DTX-nın həyata keçirdiyi əməliyyatla Xarici İşlər Nazirliyindəki korrupsiya cinayətlərinin üstü açıldı. Bu nazirlikdə baş verən biabırçılıqlara münasibətiniz necədir?
– Mən vaxtında bu qurum, onun başında duran şəxs haqqında fikirlərimi demişəm. Artıq nazirliklə bağlı hər şey bəllidir. Hörmət və rəğbətlə dəyərləndirdiyimiz DTX-nın keçirdiyi əməliyyatlar göz önündədir. Hazırda istintaq işləri aparılır, istintaqın gəldiyi nəticələri gözləməliyik. Mən fikirlərimi vaxtilə demişəm və dediklərimin üzərində də dayanıram. Bir daha təkrar edirəm ki, Elmar Məmmədyarov Xarici İşlər naziri vəzifəsinə layiq şəxs deyil. Təəssüflər olsun ki, E.Məmmədyarov ona göstərilən böyük etimadı nəinki doğrultmadı, eyni zamanda idarə etdiyi nazirliyi korrupsiya və rüşvətxorluq yuvasına çevirdi. Çox təəssüf…
– Siz də hesab edirsiniz ki, nazirin xəbəri olmadan XİN-də belə korrupsiya əməlləri baş verə bilməzdi?
– Başqa necə ola bilər? O, necə nazirdir ki, rəhbərlik etdiyi strukturda nələrin baş verdiyindən xəbərsizdir? Qətiyyən mümkün deyil. O, birbaşa bu proseslərin iştirakçısı və rəhbəridir.
– Sizcə, bu hadisələrdən sonra E.Məmmədyarov nümunə göstərərək istefaya getməlidirmi?
– Mən özümün şəxsi fikrimi ifadə edə bilərəm. Əvvəla, bundan sonra istefaya yer qalıbmı? Xeyli müddət əvvəl istefaya getməli idi. İndi istefaya getməli deyil, əməllərinə görə cavab verməlidir. İstefa yüksək siyasi mədəniyyətdir. İstefa verib deyirsən ki, mən bacarmadım. Cəmiyyətdən və Prezidentdən üzr istəyib durursan kənarda. Amma E.Məmmədyarov kreslosundan möhkəm yapışıb. Hətta bir neçə gün əvvəl hüquq-mühafizə orqanlarına müraciət etmişdi ki, məni müdafiə edin. Bataqlığın içindədir, lakin özünü görmür və dərk etmir. Üstəlik, onun barəsində tənqidi fikirlər söyləyənlər haqqında hüquq-mühafizə orqanlarına müraciət edir ki, məni qoruyun. Korrupsioner, rüşvətxor, Ermənistanın Azərbaycana təcavüzünə qarşı diplomat olaraq iradəsini ortaya qoymağı bacarmayan zəif və iradəsiz bir insan niyə müdafiə olunmalıdır?
(azpolitika.info)
