5 aprel 2024-cü il tarixdə Marketinq Fəaliyyətinin İnkişafına Dəstək İctimai Birliyinin (MFİD) dəstəyi ilə “Şəhid ailələri və müharibə iştirakçılarının sosial təminatı sahəsində dövlət xidmətlərinin qiymətləndirilməsi və bu sahədə ictimai məlumatlılığın artırılması” mövzusunda dəyirmi masa təşkil edilmişdir.
Tədbirin məqsədi Bakı şəhəri, Quba, Qusar və Xaçmaz rayonlarında 100 nəfər
şəhid ailəsinin üzvü, müharibə veteranı və qazilər arasında keçirilmiş Sorğunun və müvafiq qanunvericiliyin təhlili ilə bağlı araşdırmanın nəticələrini təqdim etmək, maraqlı tərəflərin təklif və rəylərini eşitmək idi.
Dəyirmi masada Azərbaycan Respublikası Əmək və Əhalinin Sosial Müdafiəsi Nazirliyi yanında İctimai Şura və Sosial Xidmətlər Agentliyinin və qeyri-hökumət təşkilatlarının nümayəndələri, həmçinin müharibə veteranları və qazilər iştirak etmişdir.
Tədbirin açılışından sonra şəhidlərin və müasir Azərbaycan Ordusunun təməlini qoymuş Ulu Öndər Heydər Əliyevin xatirəsi bir dəqiqəlik sükutla yad edilmiş, daha sonra MFİD-in rəhbəri Sənan Yəhya araşdırmanın nəticələrini iştirakçılara təqdim etmişdir.
Onun məlumatına görə Şəhid ailələri və müharibə iştirakçılarının dövlət təminatları və güzəştlərə dair AR qanunvericiliyi barədə məlumatlılığı aşağı səviyyədədir. Bununla belə respondentlərin 80%-i öz hüquqları ilə bağlı məlumat və ya məsləhət xidməti almaq üçün hər hansı bir təşkilata müraciət etməmişdir.
Tədqiqatın nəticələrinə görə şəhid ailələrinin üzvləri və müharibə iştirakçıları əsasən göstərilən xidmətlərin operativliyindən və keyfiyyətindən razıdırlar. Belə ki, onların 38%-i xidmətin səviyyəsini yüksək, 36%-i qənaətbəxş qiymətləndirmişdir, 19%-i isə xidmətin gecikdirildiyini bildirmişdir. Respondentlərin əksəriyyəti (71%) müraciət etdikləri qurumların özlərinə qarşı münasibətindən razılıq edirlər.
Respondentlərin 41,9%-i tibbi xidmətlərin səviyyəsini yaxşı, 39,5%-i qənaətbəxş hesab edir.
Dəyirmi masada əlilliyin qiymətləndirilməsi və bu sahədə mövcud problemlər daha çox müzakirə edildi. Araşdırmanın nəticələrinə görə respondentlərin 79,1%-i bu proses zamanı hər hansı bir problemlə üzləşməyib, 20,9% respondentin üzləşdiyi əsas problemlər tibbi müayinənin dəqiq olmaması, süründürməçilik, tələb edilən sənədlərin çox olması və elektron sistemə daxil olma ilə bağlı çətinlikdir.
Müharibə əlillərinin 69,8%-i reabilitasiya proqramlarında iştirak edib. Cavablara görə bu proqramlar onlar üçün qismən faydalı (60%) və çox faydalı (36,7%) olub.
Ekspertlərin rəyinə görə ümumilikdə araşdırmanın nəticələri müsbətdir, şəhid ailələri, müharibə əlilləri və veteranlarının sosial təminatı müvafiq qanunvericiliyə uyğun olaraq tənzimlənir və həyata keçirilir. Bununla belə, bu həssas qrupa daxil olan insanların məşğulluğunun təmin edilməsi və hüquqi maarifləndirilməsi sahəsində əlavə tədbirlərə, həmçinin həyata keçirilən fəaliyyətlərə dair monitorinq və hesabatlılığın yaxşılaşdırılmasına ehtiyac olduğu vurğulanmışdır.
Təqdimatdan sonra Sorğunun nəticələri barədə, həmçinin şəhid ailələri və müharibə iştirakçılarının sosial təminatı sahəsində görülən işlər və bu sahədə mövcud problemlər barədə fikir mübadiləsi aparılmışdır. Tədbirdə iştirak edən “Şəhid Ailələri, Əlillər və Müharibə Veteranlarının Müdafiəsi” İctimai Birliyinin nümayəndəsi və qazilər ehtiyac və problemlərini iştirakçıların diqqətinə çatdırmışlar.
