“Vətən müharibəsi başlamazdan qabaq qardaşım Səbuhi Əhmədov gizir rütbəsi almışdı, fərqlənmə nişanı vermişdilər”.
Müstəqil.Az xəbər verir ki, bu sözləri sentyabrın 12-13-də Ermənistanın təxribatının qarşısını alarkən şəhid olan SOS uşaq kəndində böyümüş Səbuhi Əhmədovun qardaşı Sənan Əhmədov deyib.
O bildirib ki, müharibə başlayanda qardaşı da döyüşlərdə ön sırada olub:
“Suqovuşan, Zəngilan, Ağdərə, Füzuli istiqamətində döyüşüb. Mən qardaşımı düşünürdüm ki, görəsən, haradadır, necədir? Səbuhi Şəki batalyonu ilə döyüşə girdi. Suqovuşan istiqamətində döyüşlərdə ayaqlarından qəlpə yarası aldı.
Ümumilikdə üç dəfə yaralanmışdı Səbuhi. Yeddi gün müalicə aldı, sonra dedi, ürəyim partlayır, dayana bilmirəm. Zəngilana getdi. Döyüş zamanı maşında sıxılıb qalan silahdaşını xilas edərkən əlini yandırmışdı. Ağdərə istiqamətində də baş nahiyəsindən qəlpə yarası almışdı. Səbuhi 44 günlük Vətən müharibəsindən dörd medal ilə qayıtmışdı”.
Sənan deyir ki, qardaşı ilə bağlı məlumat ala bilmədiyi günlərdə xəbər gəlmişdi ki, Səbuhinin taqımından şəhidlər var:
“Çox qorxurdum ki, qardaşıma da nəsə olar. Səhvən demişdilər ki, Səbuhi şəhid olub, amma sağ idi. Zəng edib, “Mənim qardaşımın nəşi gəlib?” soruşmaq çətin idi. Sonra mənimlə əlaqə saxladı, dedi, yaxşıyam. Vətən müharibəsindən sağ-salamat qayıtmışdı deyə mən inanmırdım ki, nə vaxtsa qardaşım şəhid ola bilər. Mən onunla fəxr edirəm, amma bunu qəbul etmək mənim üçün çox çətindir”.
Könül Cəfərli
