Azadlığın maya dəyəri…
Yox, o deyil bətndəki təklik!
Yox, o deyil doğuşdakı gerçəklik.
Kişidə ac qadın, qadında tox kişi həsrətidi – o!
Şərabda tanrıdan gizlənən kafir cənnətidi – o!
Yox, o deyil küçədəki səy-küy,
Yox, o deyil izdihamın atası.
Pəncəsindən acizliyin qanını yalayan bir pələngdir – o!
Bir uşağın ağlaya-ağlaya arxasınca qaçdığı çərpələngdir – o!
Yox, o deyil təhqirdən güc alan müqəddəs!
Yox, o deyil qatır başlı firon!
O – adi bir ehtiyac, gündəlik və sonsuz.
Alsan – həyatın bahasına,
Satsan- çörəkdən ucuz!
Aqşin Yenisey
