Azərbaycanın Avstriyadakı səfirliyində almandilli məkanda ən məşhur aktyorlardan biri olmuş Hans Mozerin (1880-1964) vəfatının 60 illiyi münasibətilə onun həyat və yaradıcılığına həsr olunmuş fotosərgi təşkil olunub. AZƏRTAC xəbər verir ki, tədbirdə Vyana şəhərinin meri Mixael Ludviq, Vyana Şəhər Şurasının, Avstriya Film Arxivinin, Vyana İncəsənət Muzeyinin, Film Akademiyasının, Film İnstitutunun nümayəndələri, görkəmli aktyorun ailə üzvləri, kinosevərlər və bu ölkədə yaşayan soydaşlarımız iştirak ediblər.
Əvvəlcə tədbir iştirakçılarına 150-dən çox filmə çəkilmiş və avstriyalıların kollektiv yaddaşında özünəməxsus yerə malik aktyorun həyat və yaradıcılığından bəhs edən sənədli film nümayiş olunub.
Tədbiri giriş sözü ilə açan Avstriyadakı səfirimiz Rövşən Sadıqbəyli bildirib ki, 2001-ci ildən Azərbaycan səfirliyinin yerləşdiyi və şəhər sakinləri arasında “Hans Mozer villası”nda görkəmli aktyorun həyatında önəmli yer tutur. O, görkəmli kino və teatr aktyorunun 30 ildən çox yaşadığı villada Hans Mozer sənətinin pərəstişkarlarına xüsusi seçilmiş fotolardan ibarət fotosərginin ərməğan edilməsindən məmnunluğunu ifadə edib.
150-dən çox filmdə çəkilən, çox sayda tamaşada və operettalarda baş rol alan, eyni zamanda, xalq mahnılarının mahir ifaçısı olan Hans Mozerin çıxışları özünəməxsus və müstəsna yumor üslubu ilə seçilib və bu, ona həm ölkə daxilində, həm də xaricdə tamaşaçılarının qəlbini fəth etməyə imkan verib. Komik rolların mahir ifaçısı Hans Moserin irsi əyləncədən kənara çıxır, o, adi həyatdan götürülmüş sadə insan obrazlarını ekranda məharətlə canlandırır və tipik Vyana ləhcəsi ilə onlara orijinal və yaddaşlarda dərin iz buraxan bir görkəm verirdi. Avstriya kinosunun tanınmış nümayəndəsi kimi o, ictimai norma və dəyərləri qiymətləndirərək və dəyişdirərək müharibədən sonrakı cəmiyyətin formalaşmasında kinonun mühüm roluna töhfə verib. H. Mozer Avstriyada gənc aktyor nəsli üçün ilham mənbəyi idi.
Səfir diqqətə çatdırıb ki, H. Mozer 1932-ci ildə sonradan “Hans Moser villası” kimi tanınan binanı alıb. Bu gün Azərbaycan bir vaxtlar Avstriya kino sənətinin ikonası olmuş Hans Mozerin villasını tarixi və mədəni irs kimi qoruyur və səfirlikdə təşkil edilmiş fotosərgi Avstriya xalqına, onun mədəniyyətinə və tarixinə olan diqqətin nümunəsidir. Çünki Hans Mozer irsi Avstriya və Azərbaycan xalqlarını bir araya gətirən daha bir bağdır.
Vyana şəhərinin meri Mixael Ludviq çıxışında Hans Mozerin həyat və yaradıcılığından, onun Avstriya xalqının qəlbində tutduğu yerdən və xarakterik vyanalı obrazlarından bəhs edib. Mer H. Mozerin xatirəsinin əbədiləşdirilməsində görülən işlərə, təşkil olunan tədbirlər və səfirlik məqsədləri üçün adaptasiya edilmiş villanın bərpasına görə Azərbaycan tərəfinə öz minnətdarlığını bildirib.
Avstriya Film Akademiyasının təmsilçisi Oliver Ştanql çıxışında Hans Mozerin kinoaktyor kimi yaradıcılığına nəzər salıb, onun canlandırdığı obrazlardan bəhs edib. O, Ştanql Avstriya kino tarixində önəmli yerə malik sənətkarın xatirəsinə Azərbaycan səfirliyində təşkil edilən tədbir və göstərilən diqqətə görə təşəkkür edib.
Sonra qonaqlar fotosərgi ilə tanış olublar. Fotosərgidə H. Mozerin Azərbaycan səfirliyinin yerləşdiyi villada müxtəlif illərdə ailə üzvləri, dostlar və qonaqları ilə çəkilmiş fotoları, həyatının önəmli anlarının əks olunduğu şəkillər nümayiş olunub.
Qeyd edilməlidir ki, Azərbaycan səfirliyi tərəfindən müxtəlif illərdə H. Mozerin xatirəsinə tədbirlər təşkil olunub, hətta 2007-ci ildə tanınmış incəsənət xadiminin xatirəsinə səfirliyin girişində xatirə lövhəsi açılıb.
Tədbirin bədii hissəsində Avstriyada təhsil alan gənc azərbaycanlı pianoçu, beynəlxalq müsabiqələr laureatı, Qran-Pri mükafatçısı, Avstriyanın Anton Brukner adına Konservatoriyasının tələbəsi Ayan Məmmədlinin Hans Mozerin çəkildiyi filmlərə bəstələnmiş həm musiqi əsərlərindən ibarət konsert proqramı ilə çıxışı, həm də məhşur sənətçi Hans Moserin yaradıcılığı haqqında şifahi təqdimatı tədbir iştirakçılarını valeh edib. “Bravo!!” nidalarını ucadan səsləndirməklə öz hisslərini ifadə edən Vyana şəhərinin meri cənab Mixael Ludviq və digər avstriyalılar konsertdən sonra Ayana yaxınlaşaraq, bu cür gözəl ifaçılığına görə ona öz dərin təşəkkürlərini bildiriblər. Cənab mer Mixael Ludviq Ayan Məmmədliyə Avstriyanın məhşur sənətkarı haqqında bu cür ətraflı bilgilərə yiyələnərək, professional şəkildə təqdim etmək qabiliyyətini, hər iki ölkənin bir-birinə olan sevgi və hörmət əlaməti kimi dəyərləndirdiyini bildirib.
