Milli Qəhrəmanımız Mübariz Ağakərim oğlu İbrahimovun Qəhrəmanlıq yolu-
əbədiyyət köçü , 18 iyun…2010-cü il…Ruhun şad olsun. Amin!
BƏDİRƏ RZA HƏSƏNQIZI yazır
(Neftçala)
Bilirsənmi…?
Nə qədər oğullar var… bənzəmək istər sənə…
Bilirsənmi, oğul, duyursanmı, sənin yolun haqq yoludur, sevib gedən, könül verən, bax, nə qədər sevənlərin vardır sənin…
Ötsün zaman, hər nə qədər, küləkləri, xəzanları…hələ zaman nədir belə, qıya bilsin bu sevgiyə…?
Ala bilməz, yora bilməz, hər şəfəqdə bil, yenidən doğulacaq, bil, yenidən parlayacaq sənə gələn sevgi yolu…
Bu yol, adi bir yol deyil, bu yol “sevgi- çeşmə” yolu! Çeşməsində qaynayır, bax, bir vulkantək kükrəyəcək -Vətən yolu! Kükrədikcə qığılcımlar, dağılacaq namərdlərin qorxaq səsi – açılacaq o çığırlar, açılacaq “ilhaq yolu”, vətənimin şərəf yolu, igidimin qeyrət yolu, ədalətin o haqq yolu, məzarsızın intizarda qalan yolu—Bu xalqımın zəfər yolu!
Açılacaq o haqq yolu!!!
Arzuların çeşməsində yaşayırsan,
Sən xalqının beşiyində doğulursan, hər gün, hər an…
Körpələrin şahzadəsi, məktəblinin vətən səsi, əsgərlərin sərkərdəsi… Ağ atlısan yuxularda, büst ucaltdın könüllərdə, ürəklərdə, hər ulduzlu gecələrdə, xəyallarda…
Bilirsənmi, nə qədər də çoxdur sevənlərin – sonsuz sənin… Bu sevginin ölçüsü yox – ilk daşından son daşına – daşıyacaq çeşmə yolu...
O, Əliabad kəndində sadə bir ailədə doğulmuşdu. Sadə olduğu qədər dəyanətli, cəsur olduğu qədər sədaqətli, halal olduğu qədər yurdsevər bir ailədə… Dinləyirik, xatirələr bir ulduz tək parlayır hər yaşamında, ömrün həsrət yollarında… Parlayacaq hər bir sözün, uşaqlığın, gənclik dövrün…
Gənclik dövrün – 22 yaşın şücaəti, Qəhrəmanlıq şəlaləsi, nəğmələrin ən gur səsi… hər damlası bir ümmandı, hər damlası bir üsyandı, yurdun nigaran yoluna, susuz dinən torpağına bir nəfəsdi, tarixində haqq yoluna, harayların həsrətinə saf yolundu…mücadilən, görk yolundu düşmənlərə… o sevginin işigıdir milyon qəlbə ümid deyən…
Örnək deyə, döydük qapın, biz o gündə bir atanın oğul- deyən həsrətində yandıq, yandıq…yanan könül bir sözü heç unutmayır…
-“Təsəllimiz yoxdu belə…tək təsəlli —xalqın məhəbbətidir. Görürük ki, xalq onu çox istəyir…”
Bir qrup məktəblini –örnək deyib, gətirdik biz, ocağına. Örnək ömür yaşamısan. Sən xalqının baş tacısan!
Öz imzanla bir yol çəkdin, əsir yurdun harayına,
Dedin budur: Belə gedək, biz yurdumun xilasına…
Kəsək xain izlərini, haqq işimiz sona yetsin,
Torpağıma xain baxan, qovulsun qoy, izi itsin!
Tənindəki mərdliyinə heyran qalıb bütün cahan,
Tək adınla ordu kimi qalib yazdın yurdu, inan!
Şükür sənə, Ey Yaradan, sədaqətə, yola şükür!
Bu millətə bəxş etdiyin cəsur oğullara Şükür!
Sarsılsın qoy xain düşmən, tor qurduğu yuvasında-
Xəyanəti dönsün ona, silinsin qoy davasında.
Əssə külək, hər nə qədər tariximdə görünəçək,
Mübarizim, ləpirində açacaqdır hər vaxt çiçək!
Milyonların sevən qəlbi, könül gözü səninlədir,
Şəhid dərdli anaların ilkin sözü səninlədir.
Səninlədir yurd haraylı didərginin ümid yolu,
Səninlədir zəfərimin sadasında igid yolu!
Qorxmaz oğul, sən tarixin daş harayı, yaddaşısan,
Doğulandan qiyamətə bu yurdumun baş tacısan!!!
Biləsuvar rayonuna daxil olarkən kəndin göz önündə canlanır… Hələ çatmamışıq kəndə…Məhəlləyə çatınca bir az da həyəcan bürüyür bizi…Sanki, ayaq basdığımız torpağın müqəddəsliyi çəkindirir bizi…layiq olmaq gərəkdir düşüncəsi ilə…borclu qalmamaq gərək, əqidəsilə…Sənin şərəf tacına-layiq olmaq gərəkdir! Getdiyin o haqq yolunun müqəddəs ətrini qorumaq gərəkdir məsuliyyətilə..
Sənin yaşadığın, sənin nəfəsin olan ocaq nə qədər doğmadır, sevgi çeşməsidir bizə…Çox söylədim mən bu sözü. Nədənini tapım deyə… başqa yolun bilməyirəm…Çün, başqa yol yoxdur belə, bu sevgidə, bu ətirdə… Laylasında ocaq olan, yuxusunda inam olan, öyüdündə ədalətə güvən olan! Sənin yolun-sevgi yolu…İnsanlığın xilasına, körpələrin yuxusuna, torpağının laylasına, Şəhidlərin, əsrlərin harayına –sevgi yolu! Əməlinin müqəddəsliyidir səni sevgilərin tacında şölələndirən, rövnəqini hər ötən gündə yenidən artıran…
Əməlin ucadır Tanrı yanında,
Haqqın dərgahında zirvədir yerin.
Sən elə örnəksən ömür yolunda
Zamanın sınağı gücsüzdür yəqin!
Şücaət adınla qoşadır, qoşa,
Layiqsən! Vətənlə əbədi yaşa!
Ey Mübariz oğul, ey cəsur əsgər,
Qisasın zamanla yetəcək başa!
Əfsanə deyimmi, yox, doğru olmaz,
Sən həyatın özü, həqiqət idin!
Qəlbində inləyən Vətən dərdini,
Qorxusuz hayqıran sədaqət idin!
Nifrətlə yeridin düşmən üstünə,
Qaranlıq gecədə lərzəyə saldın.
Qisas hökmü verən cəsarətinlə,
Min illik tarixi geriyə aldın!
Qorxu zəncirini elə firladın,
Şərəfsiz düşmənin bağrı yarıldı.
O, zülmət gecədə Rəbbim səninlə-
Sanki qisas üçün ordu yaratdı!
İnana bilmədi şərəfsiz kafir,
Verdiyi itginin fərqli sayına.
Tarixə utancla yazıldı adı,
Özgə torpağından səhv iddasına.
Ədalət hər zaman alır yerini,
Torpağa məhəbbət soyundan gəlir.
Sənə layla deyən, çox öyüd edən-
Seyid ocağından, kökündən gəlir!
Bir əməl yaşatdın tariximizdə,
İgidlər ömrünün davamı oldu.
Sənin pak niyyətin, mübarizliyin-
Elin yaddaşında bir dastan oldu!
Sorağın yayıldı, sərhədlər aşdı,
Odlar ölkəsində bir od doğuldu,
Qazandın xalqının hər kəlməsində,
Mübariz qeyrətli bir oğul oldu!
Ürəkdə nifrətin gücü coxdu, cox,
Saymaqla bitməyir xəyanət izi.
Hansın desək belə – qanla yazılmış,
Əsrlər yaman çox sınayır bizi.
Nə qədər sınansaq dönməyəcəyik!
Yenidən doğulub güclənəcəyik!
Mübariz ruhuyla açılan səhər,
Hələ çox hücümlar düzənləyəcək
RUHUN ŞAD OLSUN. VƏTƏNSEVƏR OĞUL, İLLƏRİN SEVGİ ÇEŞMƏSİDİR—GETDİYİN YOL, SƏDASINDA NƏFƏS ALIR — ÖMRÜN SƏNİN ,..
Bədirə RZA Həsənqızı –
